Shillong, Lber 19
U Paiem Kynsai N Syiem, Syiem ka Hima Bhowal u la don jingkyrmen ba ynda la dep ka jingkieng kaba don ha Pyndenborsora kan long ka jingmyntoi ïa ki nongkit nongbah haba ki leit sha Balat Border Haat, East Khasi Hills District.
U Paiem uba leit jurip ïa kane ka jingkieng ha ka sngi Palei u don jingkyrmen haba ka Bangladesh ka la ïoh ïa ka sorkar ba thymmai kan plie noh ïa ka Border Haat khnang ban ïoh ïa die ïathied biang ïa ki mar ki mata na India bad Bangladesh.
U la ïathuh ba lada ïaid na ka surok Shella Balat Road ka jingjngai kumba 15 kilometre hynrei ynda la dep kane ka jingkieng kan jngai tang 3 Kilometre ban leit sha Border Haat.
U la pynkynmaw ba ïa ka Balat Border Haat la plie ha u 2012 kaba la ai jingmyntoi shibun ïa ki paidbah ka thaiñ ban ïadie ïathied bad ki nong Bangladesh.
U la pynpaw ka jingsngew bynñiaw ba naduh ba khyllem ka Sorkar ka Sheik Hasina haba la khang ka Border Haat ka jingduhnong namar ïa ki mar ki mata ym lah shuh ban pynïaid sha Bangladesh.
U don jingkyrmen ba ka Sorkar BNP kaba dang shu synshar ïa ka Bangladesh kan plie biang ïa ka Border Haat khnang ban pynïaid biang ïa ki mar ki mata baroh ar tylli ki ri.
U la ai khublei ïa u Bah DP Wahlang ha ka por ba u long kum u Chief Secretary ka Jylla u la wan jurip ïa ka Border Haat ha u snem 2023 uba la kular ban shna ïa ka jingkieng ha Pyndenborsora mynta ka la urlong namar ka la jan dep.
