Chandigarh, Lber:
Ki pulit jong ka Punjab ki la pynlong ïa ka jingkhynra kaba jur ha kylleng ki jaka jong ka jylla kum shi bynta jong ka jingïakhun pyrshah ïa u drok kaba dang ïaid shakhmat, ba la tip kum ka ‘Yudh Nashian Virudh’, ha kaba la lah ban ujor haduh 155 tylli ki jingjia bad la ïoh ban kem haduh 187 ngut ki briew ha ka shisngi, ong u Director General of Police (Law and Order) u Arpit Shukla ha ka sngi Palei.
Haba kren halor kane ka jingpynroi, u DGP u la ong ba ïa kane ka jingkhynra la pynlong katkum ka jingbthah jong u Myntri Rangbah ka Punjab u Bhagwant Mann bad la thmu ïa ki jaka ba la ithuh ba don drok ha kylleng ka jylla.
“Ïa kane ka jingtreikam la khmih bniah da ki ophisar ba heh, kynthup ïa ki ADG, IG, bad ki DIG na ka jaka treikam ba kongsan, ryngkat bad ki SSP bad ki DIG jong ki distrik. Ngi la ïoh jingtip haduh 155 tylli ki jingjia haduh ba la thoh ïa ka khubor, ngi la ïoh kem ïa 187 ngut ki briew bad ïoh kurup ïa u drok heroin bad ki dawai kuli kiba bun bha,” ong u Shukla.
Haba pynpaw ïa ka jingktah jong kane ka jingkhynra kaba la neh shisnem, u la ong ba ka ‘Yudh Nashian Virudh’ ka la long ka atiar ban tehlakam ïa ki kam ba ïadei bad u drok ha Punjab.
“Ka jingïalap ka la treikam naduh shisnem bad ka la pynlong ïa ka jingbuh jingmudui kumba 80,119 tylli ki jingjia, ha kaba la kem haduh 54,190 ngut. Nalor kata, palat 2,384 kilo u drok heroin la ïoh ban kurup haduh mynta,” u la bynrap.
Ha kawei pat ka jingjia kaba kham hashwa kata ha ka 14 tarik u Lber, ki pulit ka Amritsar Rural Police ki la ïoh ban kem ïa kawei ka kynhun lehnoh bad ka kynhun khaïi tiar ïaleh ba la kyrshan da ka kynhun syntiat, da kaba kem ïa arngut kiba shah kynnoh bad ïoh kurup ïa ki suloi, ki pistol, bad ki kuli ïasiat, ong u DGP jong ka Punjab.
Ha ka jingtohkit ba nyngkong la lap ba kine kiba shah kynnoh ki don ka jingïadei kam bad ki nongpynïaid ïa ki marbam kiba nabar ri lyngba ki Social Media. Ka kynhun ka la don bynta ruh ha ka jingpynlong niam bad pynphriang ïa ki khana pyrshah ïa ka India bad ki pulit.
Ha ka jingthoh halor ka rynsan X, ki pulit ka Punjab ki la ong, “La ujor ejahar ha ka jaka treikam jong ki pulit ka Gharinda, Amritsar Rural. Ka jingtohkit kaba kham bniah ka dang ïaid shakhmat ban pynlong ïa ki jingïadei shakhmat bad shadien bad ban pynpra noh ïa ka kynhun baroh kawei. Ki pulit ka Punjab ki dang bteng ban pynklaiñ ïa ka jingpyntreikam halor ka jingthmu ban pynduhjait ïa ki kam pyntriem jong ki lehnoh, ki jingwan jong ki tiar ba long beaiñ bad ki kam sniew.”
Kawei ka suloi AK-47 kaba don ar tylli ki kuli bad 36 tylli ki kuli bym pat pyndonkam, ryngkat bad lai tylli ki suloi Glock 9mm kiba khlaiñ bor bha, la ïoh bad kurup na katei ka kynhun kaba la shah kynnoh.
