Shillong, Lber 20
Ka Khasi Students’ Union (KSU) ka la byrngem ban khang ïa kino-kino ki ophis Sorkar, ki prokram Sorkar bad skul kiba pynbor ban rwai baroh hynriew tylli ki dkhot jong ka jingrwai ‘Vande Mataram’ da kaba kdew ba ha kita ki dkhot la kren shaphang ka niam Hindu bad ka KSU ka pyrshah ïa kane ka hukum jong ka Sorkar Pdeng.
U Samla Donald V Thabah General Secretary KSU u la ong, “Ha u bnai ba la dep ka Sorkar India ka la bthah ïa ki skul, ki ophis Sorkar bad ha kino-kino ki prokram ba dei jong ka Sorkar ba kin rwai ïa baroh hynriew tylli ki dkhot jong ka jingrwai ‘Vande Mataram’, kiba ha kane ka jingrwai ki don tang ar tylli ki dkhot kiba kren shaphang ka ri India, hynrei kiwei ki dkhot ki kren shaphang ka jingngeit Hindu jong ki.”
U la ong ba kane ka dei ka jingthmu ba na sha lyndet jong ka Sorkar Pdeng ban pynkylla Hindu lut bad ba baroh yn hap ban bud ïa ki riti dustur jong ki, ban klet noh ïa ki riti dustur lajong, kaba u la kynnoh ba kane ka dei ka jingïuhroit ïa ki jaitbynriew ritpaid.
U Samla Donald u la pynkynmaw ba ha ka snem 1950 ka la don ka jingpynbor ïa ki Khasi ba, “Ngi dei ban kren da ka ktien Hindi bad ba ngi dei ban klet noh ïa ka ktien lajong, hynrei ki nongïalam jong ka jaitbynriew Khasi ha kito ki por, ki la ïeng ban pyrshah ba kim treh ban kren Hindi.”
Shuh-shuh u la pynkynmaw ïa ka jinglen lade ki dkhot bad ki nongïalam jong ka KSU ha ki por ba la dep bad ki jingeh ba har rukom ki dkhot ki la mad.
Ha ka jingïaid lynti ka KSU la 48 snem mynta shibun ki mat ka la ïaleh kum ha ka ban ïada ïa ka jaitbynriew na ka jingwan rung kyrthep ki mynder ri, ka la pyrshah ïa ka Citizenship Amendment Act, hynrei ka Sorkar India kam sngap, ka Sorkar India ka la wanrah ïa ki aiñ kum ka Uniform Civil Code (UCC) ki aiñ kiba long pyrshah ïa ki riti ki dustur ba la suid la shor da u mynbarim.
“Ka KSU ka la shakri 48 tylli ki snem na ka bynta ka ri bad ka jaitbynriew, kan ïai shakri lada dei sa sawphew phra hajar snem ruh ban pynpaw sha ka pyrthei baroh kawei ba ka jaitbynriew jong ngi ka dei kaba im, ka KSU ka long kaba kloi ban len lade ban ïada la ka jong ka khyndew ka shyiap ïa ka ri bad ka jaitbynriew” la ong u Samla Donald.
Ka Khasi Students’ Union ha ka sngi Thohdieng ka la kynmaw tympang ïa ka jingdap ba 48 snem jong ka seng, ba ka 20 tarik u Lber 1978 ka dei ka sngi ba la suid la shor ïa ka Seng ki Samla pule, ha kaba ka la pynlong ïa ka jingïalang ba lyngkot hakhmat u Mawnam ba don ha syndah ka ophis Meghalaya Board Of School Education ha Lower Lachaumiere, Shillong.
