Shillong, Lber 20
Ka Garo Hills Autono-mous District Council (GHADC) kan pynlong ïa ka Dorbar Kyrpang kaba ar sngi, ha ka 23-24 tarik u Lber ban mynjur ïa ki jingpynkylla ha ka ‘AD Rules’ hadien ka jingïakhih halor ka jingïashim bynta ki bym dei ‘riewlum ha ka ilekshon sha ka District Council.
“Ka ‘agenda’ ka long kaba shai bha: kawei ka mat ka dei shaphang ka jingpynkylla ïa ka ‘AD Rules’ bad halor kata to ai ba yn mynjur ïa ka jingpynkylla,” ong u Symbud Myntri Rangbah ka Jylla ka tnad District Council Affairs (DCA), Bah Prestone Tynsong haba ïakren sha ki nongthoh khubor ha ka Sngi Thohdieng, da kaba bynrap ba kane ka jingpyntreikam kam dei tang na bynta ka ‘Rule’ 128.
“Ngi don 7, ngi don 8…wat poi sha ka jingpynkut. Ai lad ba ka jingpynkylla kan urlong; ngi hap ban burom ïa ka rai jong ka Ïingdorbar,” u la ong. Na ka liang u Bah Prestone u la kyntait ban batai bniah ïa ki jingkylla ba kyrpang shuwa ban ïatai, da kaba ong: “Kumno ngan ïathuh ïa phi mynta? Ap haduh ba ka Ïingdorbar kan pdiang ne mynjur ïa ka jingpynkylla.”
Kane ka sienjam ka long hadien ka jingïakhih kaba la neh da ki taïew ban dawa ba tang ki nongjied kiba dei ki ‘riewlum kin ïashim bynta ha ki jingthep ‘vote’ sha ka GHADC, ka mat kaba u Bah Prestone u la ong ba ka Sorkar ka dang pynbeit lyngba ka rukom thaw aiñ jong ka Council hi.
Ïa kane ka Dorbar Kyrpang la khot pynlong hadien ka rai jong ka Sorkar ban pynjlan ïa ka samoi treikam jong ka GHADC da 6 bnai.
