Jowai, Lber 20
U MDC jong ka Seng Congress, u Bah Rikut Parien u la ong ba lyngba ki 3 tylli ki ‘K’ – kata ka ‘Ktien’, ‘Khyndew’ bad ka ‘Kur’ lah ban ïada bad pynneh ïa ka jaidbynriew Jaiñtia.
U Bah Rikut u la pynpaw ïa kane ha ka ‘Motion’ ba la wanrah da ma u, ba kumno ban shim ki lad ki lynti ban ïada bad pynneh ïa ka jaidbynriew Jaiñtia ha ka Dorbar Mang Tyngka ha ka 20 tarik Lber.
U MDC jong ka Seng Congress u la ong ba u ‘K’ uba nyngkong u kdew ïa ka ‘Ktien’ ba kumta ka donkam ban pynkylla pynthymmai ïa ka ‘AD Rule’ jong ka JHADC ban ai lad ïa ki MDC ban bam smai ha ka ktien Khasi bad ktien Jaiñtia hynrei mynta ki MDC ki lah ban bam smai tang ka ktien phareng bad kaba kham donkam shuh shuh dei ban kham pyrkhing ïa ka kyndon 128 jong ka AD Rules (kaba batai mano ba lah ban thep ‘vote’ ha ki ileshon MDC) khnang ban kiar ban long kum ka Ri-lum Garo (haba ki mynder ri ki lah ban thep ‘vote’ ha ka ilekshon MDC).
Haba batai ïa u ‘K’ uba ar, u Bah Rikut u la ong ba ka Section 4 (1) (e) (f) jong ka Meghalaya Lands Transfer Act, 1972 ka buh ka jingma kaba khraw ïa ka jaidbynriew namarba ka ailad ïa ka jingai wai jong ki jaka-puta sha ki kompani bad kharkhana da ki shispah snem ne 99 snem bad kumta ka donkam ban pynkylla noh ïa kane ka kyndon aiñ bad kyntu kynpham ïa ka Executive Committee ban shim ïa ki lad ki lynti kumno ban ïada ïa ka khyndew ka shyiap.
Halor u ‘K’ uba lai, u Bah Rikut u la ong ba ïa ka jaidbynriew Jaiñtia la pynwandur da ki Kur Ki Jait bapher-bapher kumta ka donkam ïa ka JHADC ban ithuh ïa ki Dorbar Kur da kaba thaw ïa ki aiñ kiba kyrpang.
Haba kyrshan ïa katei ka ‘Motion’, u MDC jong ka VPP, u Bah Jamshaphrang Pohtam u la ïathuh ba ki don ki jingshad ha ki thaiñ War Jaiñtia kiba la sdang duh jait noh kumta u la kyntu ïa ka Executive Committee ban pynlong ïa ka jingiit bniah ne ‘Research’ bad pynwandur noh ha ka jingthoh-jingtar ne ‘Documentation’.
Haba ai jingpynshai ïa katei ka ‘Motion’, u Deputy Chief Executive Member, u Bah Lasky Rymbai u la ïathuh ba ka Executive Committee ka la dep ban thaw ïa ka tnad Arts & Culture ha ka 7 tarik u bnai Nailur, 2017 bad ka la pynwandur ruh ïa ka ‘Jaiñtia Phonetic Alphabet’ bad ka la dep pynmih ruh ïa ka ‘Notification’ ban ithuh noh ïa ki Kur hapoh ka jingkhmih jong ka JHADC ban ïada ïa ka jaidbynriew Jaiñtia. U la ïathuh ba ka Council ka la dep pynkylla pynthymmai ïa ka ‘AD Rules’ jong JHADC bad mynta ka dang sah ha u Lat ban ai ïa ka mukhor jong u.
Na ka liang jong u CEM ka JHADC, u Bah Thombor Shiwat u la ïathuh ba u la shimti hi dalade kum u Shongknor ne Chairman jong ka ‘Customary Law Committee’ khnang ban pynsted ïa ki kam ki jam kiba ïadei kumno ban ïada ïa ka jaidbynriew Jaintia.
U la ïathuh ruh ba ka Executive Committee ka la thmu ban thaw ïa ki aiñ kiba kyrpang na bynta ki Elaka bapher-bapher hapoh ka JHADC hynrei kam pat shym la urlong haduh mynta namar ba ki don ki Dolloi kiba kim pat wan ai ïa ki kaiphod ne jingthoh haba ïadei bad ki Elaka jong ki.
