Shillong, Lber 20
Ka Hynñiewtrep Integrated Territorial Organisation (HITO) ha ka sngi Thohdieng jong ka taïew, ka la dawa ïa ki bor ba dei khmih ïa ka tnad khlaw ban pynsangeh noh mardor ïa ki jingai jingmynjur ïa ka Riangdo Veneer Pvt. Ltd da kaba kynnoh ba katei ka karkhana ka pyntreikam ïa ki kor mashin ‘bandsaw’ bad ki mashin ot dieng khlem jingbit, ka pynlang ïa ki dieng khlem jingkheiñ bad ka pynsah ïa 400-500 ngut ki nongtrei ha ki jaka bym long shngaiñ. Ha ka jingujor sha u Chief Forest Officer, u President ka HITO u Bah Donbok Dkhar u la ong ba ka seng ka la leit jurip ïa ka karkhana myn ha ka 18 tarik u Lber 2026, ban dawa thungkam ïa ki samla trai Jylla hynrei ha ka jingjurip, la lap ba kane ka karkhana ka la pyndonkam bun tylli ki kor mashin kiba khlem ïoh jingbit na ka ophis ba dei khmih.
U la kynnoh ruh ba ka karkhana ka don tang katto-katne ki shithi hynrei kam don pat ki kot ki sla ba donkam na ka MIDC ban pyntreikam ïa ka karkhana.
“Bun na kine ki nongtrei la ïathuh ba ki hap ban trei ym duna 12 kynta man ka sngi khlem ka jingsiew ne bai lutksan kaba tista kaba long beaiñ katkum ka tnad Labour” la ong ka HITO da kaba ban jur ïa ka jingbym biang ka jaka theh ñiut nalor kiwei-kiwei de.
U Bah Donbok u la ong ruh ba ki dieng kiba la eksamin kim don dak ban pynthikna na ei ki wanrah, kaba la wanrah ka jingkylli, kumno la wan kit ïa ki dieng bad hato la ïoh jingbit ne-em na ka tnad khlaw.
Ka HITO ka la dawa ïa ka tnad ban sangeh pynthymmai ïa ka lisen da kaba ban jur ïa ka jingdonkam ïa ki lad ki lynti kiba kham pyrkhing namar ka ktah ym tang ïa ka kamai kajih jong kiba bun ki briew, hynrei wat ïa ka jinglong ba janai jong ki marpoh khyndew jong ka Jylla.
