Shillong, Lber 20
Ka lympung ‘Late P.A. Sangma Memorial T20 Cricket Tournament 2026’ ba la pynlong da ka Shillong Cricket Association ka la bteng hynne ka sngi da ka jingïalehkai hapdeng ka Rangkynsai SC pyrshah ïa ka Lawsohtun CC. Ha ka jingkynting pisa la ïoh kam trai da ka Rangkynsai SC, bad ka la jied ban tied hadien.
Ka Lawsohtun CC ka la ïoh 62 ron bad u nongtied bol ba kham kynsai u long u Kynsaibor Lyngkhoi uba ïoh 29 ron bad u Aryan Borah u la ïoh pynhap 2 wiket.
Ha kane ka jingïalehkai la pynduna noh sha ki 5 over da ka DLS Method, ka thong ka long 21 ron na ki 5 over.
Ka Rangkynsai SC ka la ïoh 24 ron, u Ajay Duhan u la ïoh 21 ron uba la long u nongtied bol ba kham kynsai katba u Peter Lyngkhoi u la khur 1 wiket.
Ka Rangkynsai SC ka la jop noh ïa ka jingïalehkai da 9 wiket lyngba ka DLS Method bad ïa ka nam ‘Player of the match’ la ïoh da u Ajay Duhan u ba la ïoh 21 ron bad khur 1 wiket.
Ha kawei pat ka jingïalehkai kaba bud ka Sporting CC ka la ïakhun pyrshah ïa ka Capital Stars.
Ha ka jingkynting pisa la kam trai da ka Sporting CC bad ka la jied ban tied ha shuwa, kaba la lah ban kamai haduh 104 ron ha ki 13 over. U Gagandeep Singh u la ïoh 25 ron bad u Avinash Rai 24 ron kiba la long ki nongtied bol kiba kham kynsai. Katba u Dharani Dhar Rabha u la khur 2 wiket bad u Aniket Basfor 1 wiket.
Ha kaba beh ïa ka thong ka Capital Stars ka la ïoh 105 ron na ki 8.1 over. U Ronit Akhter u la kamai 71 ron bad u Asif Washimul Haque 26 ron ki long kiba kham lah kamai bun ron. Ha ka liang ki nongkawang bol u Kishan Jaiswal u la ïoh tang shi wiket.
Haba kut ka jingïalehkai ka Capital Stars ka la jop noh da 9 wiket bad ïa ka nam ‘Player of the match’ la ïoh da u Ronit Akhter uba la ïoh 71 ron.
