Jerusalem, Lber:
U Myntri Rangbah duh jong ka Israel, u Benjamin Netanyahu ha ka Sngi Palei, u la ong ba ka Iran, kam don bor shuh ban pynriewspah ia u Uranium lane ban shna ia ki namding, hadien 20 sngi jong ka jinghiar thma na suin jong ka US bad ka Israel.
“Ngi dang jop, bad ka Iran ka shah pynjot”, la ong u Netanyahu, da kaba kdew ba ki tiar siat bad ki drone jong ka Iran, ki shah pynjulor bha bad kin sa shah pynjot.
“Kaei kaba ngi pynjot mynta ka dei ki karkhana kiba pynmih ia ki tiar ban shna ia kine ki namding bad ban shna ia ki tiar nuclear kiba ki pyrshang ban pynmih”, la ong u Netanyahu.
U Netanyahu um shym la ai sakhi sabut halor ka jingong jongu ba ka Iran kam don bor shuh ban pynriewspah ia u Uranium.
Ka prokram nuclear jong ka Iran ka la long ka phang pdeng jong ki jingïakren ba la pynïasuk ha kaba kut ki la khyllem noh ha kaba ka US bad ka Israel ki la hiar thma da ka liengsuiñ ïa ka Iran ha ka 28 tarik u Rymphang.
Wat hapdeng ka thma kaba la jan dap lai taiew, hynrei ka dang long kaba kloi palat ban iathuh la ki nong Iran kin mih ne em sha surok ban pyrshang ban pynkhyllem ia ka sorkar jong ki, ong u Netanyahu.
“Ka shong ha ki paidbah Iran ban pyni ia kata, ban jied ia ka por bad ban kiew sha ka por”, u la ong.
Katba ka thma haduh mynta la pynlong lyngba ki jinghiar thma na suin, u Netanyahu u la ong ba ka hap ban don ka bynta ba shapoh ruh kumjuh bad “ki don shibun ki lad na ka bynta kane ka bynta ba shapoh.” U la batai bniah.
