Shillong Lber 20
U Symbud Myntri Rangbah ka Jylla u Bah Prestone Tynsong u la ong ba ha ka jingtohkit kim pat lap ksai halor ka jingkynnoh ba don ka jingïadei ha ka saiñ pyrthei ha ka jingjia mih ka jingïakynad ha Rilum Garo dang shen.
U la pyntip ba ki bor District ki dang pynkhlaiñ ïa ka jingpahara na ka bynta ka jingrakhe Eid.
“Ka jingtohkit ka dang ïaid shakhmat. Kumba ka long mynta, ngam pat lah ban ong mynta namar kam pat poi sha kaba kut hynrei ka jingtohkit ka dang ïaid shakhmat”, la ong u Bah Prestone haba ïakren bad ki nongthoh khubor ha ka sngi Thohdieng.
U la ïathuh ba ym shym la buh ïa ka por na ka bynta ka jingtohkit hynrei ki nongtohkit ki dang bishar bniah ïa ki jingjia hadien ki jingïakhih halor ka jingpynkynriah ïa ka ilekshon GHADC bad ka jingshah kem jong ki katto katne ki nongïalam seng treimon sngewbha.
Kane ka jingkren jong u Bah Prestone ka la mih hapdeng ka jingjur jong ka jingïakynad ha Garo Hills, ha kaba ki sengbhalang ki la byrngem ban pynlong shuh shuh ïa ki jingïakhih lada ym pyllait ïa ki nongïalam ba la shah kem.
U Symbud Myntri Rangbah u la ong ba la bthah ïa ki bor synshar District bad ki bor pynjari aiñ ban long kiba shimkhia haba ka Eid ka la jan.
“Kumta ngi la bthah ïa ki bor synshar District, kumjuh ruh ïa ki bor pynïaid aiñ ba kin kham shimkhia halor kane ka kam bad ngin pynthikna ba ki jingrakhe kin long kiba ïaid beit ïaid ryntih bad kan ïaid beit katkum ka jingthmu,” u la ong.
