Shillong, Lber 20
Ka Voice of the People Party (VPP), State Youth Wing, ha ka 20 tarik u Lber 2026, ka la leit ban kynduh ïa ka Dr. N. E Kharsahnoh, Director of Health Services (MCH&FW) ban pan jingshai halor ka jingbym pat pynmih ka Directorate of Health Services (DHS) ïa ka risol jong ka Mid Level Health Provider (MLHP) hapoh ka National Health Mission (NHM) naduh u snem 2025.
Kane ka jingleit ïakynduh ka VPP Youth Wing ïa ka Director of Health Service ka dei hadien ba la ïoh ka jingujor na kiba bun ki samla wad kam wad jam bym pat ïoh ïa ka risol haduh mynta.
Haba kren sha ki lad pathai khubor, u Bah Marbud Dkhar, President, u la ong ba ka jingbym pat pyllait ïa ka risol ka la wanrah ïa ka jingsngewkhia na bynta ki samla kiba wad kam wad jam.
Ha ka jingïakren u la ong ba ka Director ka la pynsngew ba ka Directorate ka don bynta tang ban pynlong ïa ka eksamin katba uba peit ïa ka risol u dei u MD jong ka NHM ha kaba ka la pyntip ruh ba ka jingpynslem ka dei namar ba u dei u briew uba bunkam.
Namarkata, u la kyntu ruh ïa ka Directorate ba ka dei ban shimkhia halor kane bad ban bynrap ba ka VPP kan nang ïai buddien halor kane ka bynta.
Haba kylli, u la ong ba ka jingslem ban pyllait ïa ka risol ha kino-kino ki kam ka lah ban ktah shibun ïa ki samla namar ba ki la ap khmih lynti lano kan mih.
Kumta ba ki dei ban pynmih noh mardor ïa kane ka risol thoh examin jong ki samla wad kam wad jam hapoh ka Jylla.
