Shillong, Lber 20
U Myntri Rangbah ka Jylla u Conrad Sangma u la khot sngewbha ïa ka nongïalehkai phutbol ka Jylla ka Sanfida Nongrum kaba la ïoh mihkhmat ïa ka Jylla bad ka ri India ha ki rynsan ïalehkai phutbol ha ka pyrthei bad kaba la ïoh ban thep kol nyngkong eh ïa ka Ri India hadien da ki phew snem ha ki jingïalehkai ki kynthei ha ki rynsan ka pyrthei.
Ka Sanfida Nongrum haba kren sha ki lad pathai khubor ka la pynpaw ba ka khlem poi pyrkhat ba kan ïoh jingïarap na u Myntri Rangbah bad ong ruh ba kam poi pyrkhat ba kin bun ki nongkyrshan ïa ka ha ka por ba ka leit ban ïalehkai shabar.
Ka la ai mynsiem ïa kiwei ba kim dei ban ïehnoh ïa kaei kaba ki thmu hynrei kidei ban trei shitom ïa kaei ka jingthmu kaba ki don ha ka jingim.
Ka Sanfida Nongrum ka la ïoh mihkhmat ïa ka ri India ha ka jingïalehkai ki kynthei ha ka AFC Women’s Asian Cup 2026 kaba la long ha Australia ha ka 4 tarik Lber. Ha kane ka jingïalehkai ka Sanfida ka la ïoh thep 1 kol ïa ka ri India ha ka jingïakhun pyrshah ïa ka Vietnam. Hynrei ka India ka la shah rem noh da 2-1 kol ha ka Vietnam. Ka jingïoh thep ka kynhun ki thei ïalehkai ka ri India ha ka AFC Women’s Asian Cup kadei hadien 23 snem ba ki khlem ïoh thep kol shuh kumta ka Sanfida Nongrum ka la wanrah nam ïa ka Jylla bad ka Ri ruh kumjuh watla ka kynhun ka la shah rem noh.
Ka jingkhot u Myntri Rangbah ïa ka Sanfida ka long ban ïakren bad ka ïa kaei ka jingdonkam jong ka na ka bynta ba un ai ka jingïarap.
