Mawkyrwat, Lber 20
Ka Mawsaw Govt LP, UP & RMSA Secondary School ha ryngkat ka jingiphuh iphieng ka la pynhap pyrda noh ïa ka Annual School Sports Meet 2026, kaba la long lai sngi lynter bad ïoh ban pynkut noh ha ka 19 tarik u Lber 2026.
Ïa Kane ka Annual School Sports Meet la wan ban pynhap pyrda da u Bah Renikton Lyngdoh Tongkhar, MLA ka thaiñ ha ryngkat ka jingsakhi lang ki kmie ki kpa bad ki paidbah nongshong shnong.
Ïa ka Best March Past ha une u snem la ïoh da ka Blue House, Best Discipline bad House of the year la ïoh da ka Green House.
Ïa ka nam Best Athletes Senior Boys la ïoh da u Rocky Sangriang na ka Blue House, katba ïa ka Best Athletes Senior Girls la ïoh da ka Wandashaihun na ka Red House.
U Bah Renikton Lyngdoh haba ai jingkren ha kane ka sngi u la pynpaw ka jingkmen ban ïohi ïa ka jingroi sted bad jingbun ki khynnah pule ha ka skul Mawsaw Govt LP, UP & RMSA Secondary School bad u la ïathuh ruh ba man ba u ju leit program sha ki skul Sorkar u ju rit mynsiem bad sngewlehraiñ wat ban ïashondur lang namar ka jingduna ki khynnah skul kiba don kumba 10 ne 15 ngut bad kiba riam tyrphut tyrphat namar ym don mano-mano ban pynbha briew bad ban pynkhuid ïa ki.
Hynrei u la pynpaw ka jingkmen ban ïohi ïa ka skul Sorkar ha Mawsaw ba ki khynnah skul ha nongkyndong ki la ïa ryngkat kyrdan bad kiwei ki skul da ka jingshimkhia jong ki nonghikai. Ha kajuh ka por u la ai ka jingkhublei kyrpang ïa ki nonghikai kane ka skul kiba ju pynlong kum kine ki jingïalehkai kum shi bynta ban kyntiew ïa ka kam lehkai Sports.
U Bah Renikton u la kular ruh ba un sa pynïoh ïa ka fencing bad ka surok rong ka ban leit sha skul, khnang ba ki khynnah kin lait na ka ktieh bad ka um ha ka por lyiur.
