Shillong, Lber 20
U nongïalam ba rangbahduh ka Khasi Students’ Union u Samla Lambokstarwell Marngar u la ong ba ki samla ha kane ka por ka ïa kaba mynta kim dei ban liem ha ka thma pyrkhat, namar lada ki samla ki liem noh ha ka thma pyrkhat, ka jingjop jong ki nongwei ka la ap lypa.
“Lada ngi im sngi ha kaba ïa kdew kti bad peit matdong iwei ïa iwei, ka jaitbynriew shisien ka sngi kan sa shah klun bad shah synshar ha ki nongwei shisngi, ka jingkylli ka long ïa ki samla ka mynta, aiu ngin jubab ïa ka pateng kaban sa wan” la ong u Samla Lambok.
U la pynkynmaw ba ka 20 tarik Lber 1978 ka dei ka sngi ban kynmaw tympang jong ka KSU ba dei ha kane ka sngi ba la suid la shor ïa ka bad mynta u snem ka jingïaid lynti ka seng ka la kynjoh sha ki 48 tylli ki snem.
U Samla Lambok u la ban jur ïa ki khun samla bad ki dkhot jong ka seng ba ki dei ban skhem ha ka nongrim, u la ong, “Ka jingshakri ïa ka ri bad ka jaidbynriew ka dei lyngba bun ki jingeh, hynrei kum ki samla ngi hap ban sngewthuh ba ka thong jong uwei pa uwei u samla kadei ban skhem ka nongrim hapdeng jong ki jingtynjuh.”
U la kdew ba ka seng ha ki ba bun tylli ki snem ka la ïakren sha ka Sorkar haba ïadei u pud u sam bad ka jinglong skhem ka jaidbynriew, ka pule ka puthi bad ka jingdonkam jong ki samla, hynrei kaba sngewsih ba ka jubab jong ka Sorkar ka long tang ka jingrung along ki dkhot bad u la ong “Kynmaw tang kawei ka ïingbyndi jong ka Sorkar kam dei tang ban set ïa ki riew sniew, hynrei ka dei ka skulbah jong ki samla kiba ju phrang ïa ka mynsiem ieit ri, ka mynsiem len lade na ka bynta ki mat ki jura jong ka ri bad ka jaidbynriew baroh kawei.”
U la khot la wer ïa ki khun samla jong ka Bri u Hynñiewtrep kiba don ka jingsngew kitkhlieh ïa ki dawbah bad ki jingma kiba ap ïa ka jaitbynriew, da kaba u la ong “To leh la ka jong ka kamram, na ka bynta ban tei ïa la ka jong ka jaitbynriew, khamtam ban ïakhun pyrshah ïa ki bor ba nabar kiba pyrshang ban tyllep ïa ki jingmut jingpyrkhat ki khun samla ka Bri u Hynñiewtrep baroh kawei.”
Kyntang ïawai u Samla Lambok u la pynthikna ba ka jingïakhun jong ka KSU ïa ki mat bapher-bapher nangne shakhmat kan nym lip lano-lano ruh, kiba kynthoh kiba beiñ, ai katba ki beiñ, hynrei ka KSU kan bteng ban ai ka jingshakri ban pynneh pynsah bad ban ai ka jingshong shngaiñ ïa ka ri bad ka jaidbynriew.
