Shillong, Lber 20
Ka Eastern Command ka la long ka lahduh ha ka 13th Inter Command Sport Climbing Championship 2025-26, kaba la poi sha kaba kut ha ka sngi Palei ha kane ka nongbah.
Ïa kane ka lympung ïakop ba la pynlong da ka Eastern Command Sport Climbing Node, 58 GTC, Shillong, la sdang naduh 16 tarik mynta u bnai hapoh ka jingkhmih da ka Eastern Command bad ka Army Adventure Wing jong ka tnat shipai ïada ri.
Kane ka long ka sien kaba nyngkong eh ba la pynlong ïa kane ka rynsan ïakop kiew lum da ka Indian Army ha kane ka thaiñ Shatei Lam-Mihngi bad ka la khmih lynti ban ïoh pynlong ïa ki lympung ïakop kiba kham heh ha ki snem ki ban wan.
Katei ka jingïoh nam lahduh ka Eastern Com-mand ka la wan hadien ba ka la khur 3 tylli ki takma ksiar, ryngkat mar kawei ka takma rupa bad rnong. Ïa ka kyrdan ba-ar la ïoh da ka Northern Command kaba la khur mar kawei ka takma rupa bad rnong. Kata ïa ka kyrdan balai la ïoh da ka Central Com-mand kaba la khur kawei ka takma rupa.
Ha kane ka sngi pyn-kut, la ïadon lang u Lt Gen Mohit Wadhwa, SM, GOC 101 Area, kum u kongsan ha ryngkat u Brig Joe Sabby, Comman -dant, 58 GTC. Kiwei kiba la ïadon lang ki long u Bah Finely L. Pariat, General Secretary ka Meghalaya State Olym -pic Association bad ka Kong Mal-viancy Sha-bong, President ka Megha -laya Sport Climbing and Mountaineering Association kum ki nongshah khot sngewbha.
Ha kane ka jingïakop kaba neh lai sngi lynter la wan shim bynta da phra tylli ki Commands ne ki tnat treikam jong ki kynhun shipai, ha kaba kawei pa kawei ka kynhun ka don 9 ngut ki nongkiew-lum ryngkat uwei u Coach bad uwei u Manager.
Kaba kham sngewtynnad ka long ba ki dkhot jong ka Meghalaya Sport Climbing ki la shah jied ban long kum ki nongpynïaid ïa kane ka lympung. Kine ki kynthup ïa ka Kayleigh Petra Nong-kynrih kum ka Chief Judge, u Sullmoon Lyng-doh (judge), u General Secretary ka Meghalaya Sport Climbing u Bah Wallambok Lyngdoh kum u Chief Route Sette, katba u Teimiki Sungoh bad u Bakordor Umsong kum ki Route Setter. U Pilaster Nongsiej kum u Chief Belayers, katba u Teibok Wanñiang bad ka Ibakordor Sawian kum ki Balayer.
