Shillong, Lber 20
U Superintendent of Police ka East Khasi Hills District u Bah Vivek Syiem u la maham ban pynngat katkum ki kyndon aiñ ïa ki kmie ki kpa kiba ailad ïa ki khun ba dang rit rta ban ñiah kali ne ar-shaka ha ki surokbah, kane ka jingmaham ka la mih hadien ka jingsaphriang kawei ka durkhih kaba pyni ba uwei u khynnah rit ba ha ki rta 4 haduh 6 snem ka rta u ñiah ïa ka thuk thuk (bike) ba pyndonkam da ka battery ha surokbah. U Bah Vivek u la ong ba katei ka jingleh utei u khynnah ka buh jingma bad ka pynkheiñ ruh ïa ka kyndon 4 jong ka Motor Vehicles Act, 1988 namar ba ki khynnah rit kim pat lah ban sngewthuh ïa ka rukom ñiah ha surok.
“Ka jingrit jong ki ar-shaka ka shem jingeh ïa kiwei ki nongñiah kali ban ïohi bad ki jingshah tynrah kiba rit ruh ki lah ban wanrah ïa ka jingmynsaw kaba jur” la ong u SP.
Namar kata ka tnad pulit ka kyntu ïa ki kmie ki kpa jong ki khynnah, ba ki khynnah ba hapoh 18 snem kim dei ban ñiah ïa ki arshaka ne ki kali ha ki surokbah bad ki khynnah ki lah ban shong ne ñiah tang hapoh ka jingpeit jong kiba la rangbah tang kum ha ki park, jaka ïalehkai lane ki phyllaw ïing.
“Ka tnad pulit pynïaid kali ha nongbah Shillong kan shimkhia ban peitngor ïa ki jingpynkheiñ ïa ki aiñ ñiah kali bad ki kmie ki kpa ki lah ban ngat ha ka jingpynshitom katkum ki kyndon jong ka Section 199A (amended 2019) ha ryngkat ka jingshah set phatok ba haduh lai snem bad ka kuna kaba T.25,000” la maham u SP.
