Jowai, Lber 20
Ka Dorbar Mang Tyngka jong ka JHADC ha ka 20 tarik Lber ka la mynjur ïa ka Mang Tyngka ba duna T.15,62,38,500 namar ka jinglut-jingsep ka poi haduh T.309,26,80,500 katba ka jingmih pat ka long T.293,64,42,000 na bynta ka snem 2026-27.
Ïa katei Mang Tyngka la wanrah da u Chief Executive Member (CEM) ka JHADC, u Bah Thombor Shiwat ha ka 19 tarik Lber bad la mynjur ïa katei ka Mang Tyngka hadien ka jingweng noh jong ar tylli ki ‘Cut Motion’ jong u MDC ka VPP, u Bah Awhai Andrew Shullai bad kawei ka ‘Cut Motion’ jong ka MDC ka VPP, ka Kong Deivipaïa Tongper.
Katkum katei ka Mang Tyngka, ka tnad Civil Works ka la ïoh ïa ka bhah kaba heh duh – haduh T. 144,12,21,300 bad kham bun na katei ka Mang Tyngka ka la wan na ki ‘Government Grant’.
Ka tnad Finance & Accounts ka la ïoh ïa ka bhah kaba T.37,05,67,100 katba ïa ka tnad pule-puthi la mang T.26,30,29,600.
Ka tnad Market, Agriculture, Soil & Fishery ka la ïoh T.20,11,79,300, katba ka tnad Forest pat ka la ïoh T.14,79,36,300.
La mang T.12,58,18,300 na bynta ka tnad Land Record & Land Settlement bad ïa ka tnad Land Revenue & Land Reform Department pat la mang T.11,34,99,200.
Kiwei-kiwei ki jingmang tyngka pat ki long T.13,26,96,400 na bynta ka tnad General Administration, T.6,80,69,600 na bynta ka tnad Legislative bad T.5,56,70,600 na bynta ka tnad Political katba T.5,52,08,500 na bynta ka tnad Taxation.
Katba ki jingmang tyngka kiba kham rit ki long ïa ka tnad Arts and Culture (T.2,41,97,700), tnad Judicial (T.3,37,35,900), tnad Planning (T.1,27,67,900), tnad Statistics & Information (T.1,67,01,800), tnad Stationery & Printing (T.1,47,36,100), bad tnad Village and Town Administration (T.1,56,44,900).
