Shillong, Lber 20
U Symbud Myntri Rangbah ka Jylla ba khmih ïa ka tnad kam pohïing, Bah Prestone Tynsong u la ong ba ka Jylla kan ym pyllait ïa ki nongïalam NGO kiba la shah kem ha ka por jong ka jingïakhih ha Ri-lum Garo, da kaba kdew ba ka rai ban pynkynriah ïa ka ilekshon sha ka Garo Hills Autonomous Dis-trict Council (GHADC) ka long ban ailad ïa ka Council ban pyndep ïa ki kamram katkum ka Riti-Synshar ka Ri – ha kajuh ka por ban pynneh-pynsah ïa ka shong suk shong shngaiñ.
“Lada phi ong pyllait noh ïa ki, kumno lada don ki kam be-aiñ kiba ki ïa donkti lang?” ong u Bah Prestone haba kren sha ki nongthoh khubor ha ka Sngi Thohdieng haba jubab ïa ki jingdawa ba la buh da ki NGO.
“Ka don ka aiñ ban pyntreikam bad ngi don hangne ban pyntreikam ïa ka aiñ ngim lah ban long kiba jem…ai ba ka aiñ kan shim la ka jong ka lynti. Phim lah ban ong ba phi lah ban leh katba phi kwah,” u la ong.
Halor ki jingbyrngem ban pynjur ïa ki jingïakhih lada ym pyllait ïa ki nongïalam, u la ong ba kim biang ïa ki nongrim aiñ.
“Haba ngi ujor ïa ka jingmudui, kaba mut ka don ka aiñ bad ngi hap ban bud ïa ka rukom treikam. Lada ki leit sha ka Ïingbishar, ki lah ban ïoh jamin,” ong u Bah Prestone da kaba bynrap ba wat hadien ba la pynkynriah noh ïa ka ilekshon GHADC halor ka jingdawa jong ki nongshong shnong, “ki la don ki jingpyrshang ban pynthut ïa ka jinglong-jingman ka shong suk shong shngaiñ,” kaba ka Sorkar kan ym shah satia ha kano-kano ka bynta jong ka Meghalaya.
“Ngi kut jingmut ba ngin ym ailad ïa kum kine ki jingjia ba kin ktah ïa ka shongsuk shongshngaiñ ha ka Jylla Meghalaya,” u la ong.
Haba kyrpad na bynta ka jingjai-jai ha Ri-lum Garo, u la ong ba ka jingpynjlan ïa ka ilekshon ka ailad ruh ïa ka GHADC ban pyndep ïa ki kamram jong ka katkum ka Riti-Synshar ka Ri.
“Nga kyrpad ïa ki paidbah khamtam ha Ri-lum Garo ba kin long kiba jai-jai bad katkum ka jingdawa jong ki, ngi la pynkynriah noh ïa ka ilekshon GHADC bad ha kajuh ka por, ngi ai lad ïa ka GHADC ban pyndep ïa ki kamram jong ka katkum ka Riti-Synshar kaba ki donkam ban leh,” la ong u Bah Prestone.
