Shillong, Lber 20
Ka St. Peter’s Higher Secondary School Laitlyngkot ha ka 20 tarik u Lber 2026, ka la plie paidbah ïa ka Diamond Jubilee jong ka skul.
Ha kane ka sngi ba khraw la wan ban sakhi da u Symbud Myntri Rangbah ka Jylla u Bah Prestone Tynsong, u MLA ka thaiñ u Bah Gavin M Mylliem, u MDC u Bah Shemborlang Rynjah, u Archbishop ka jylla niambah Shillong u Most Rev. Archbishop Victor Lyngdoh,u Fr. Kyrshan Kharpuri Principal jong ka skul, ki nongïalam shnong, ki nongmihkhmat na ki ophis Sorkar, ki kmie ki kpa, ki khynnah pule bad kiwei de kiba la shah khot sngewbha.
Kum ka dak jong ka jingplie ïa kane ka Diamond Jubilee, u Symbud Myntri Rangbah ka Jylla u la pynher ïa ka lama, hadien kata ha ryngkat kiwei pat kiba la shah khot sngewbha ki la pynher ïa ki balloon.
Ha une u snem Jubili ka skul kan pynlong ïa ka jinglehkmen ryngkat ki prokram ki bapher-bapher bad pynkut pat ïa ka ha u snem ban wan.
Haba kren ha kane ka sngi u Bah Prestone Tyngsong u la kitbok kitrwiang ïa ka skul bad pynbna ruh ba ka Sorkar kan noh synñiang 20 lak tyngka ban ïadon bynta lang ha kane ka snem Jubili.
Shuh shuh u la pynbna ruh ba ka Sorkar kan sa phah ïa ki ophisar ka PWD ban jurip ïa ka surok kaba ka skul ka kyrpad bad ai jingkyrmen ba kine kin sa urlong.
Ha kane ka sngi la ïoh ïa jingkren ruh na u Archbishop Victor Lyngdoh, u MLA ka thaiñ u Bah Gavin M Mylliem, u MDC u Bah Shemborlang Rynjah bad la pynshit pynshngaiñ ïa kane ka sngi da ki jingrwai jingshad jong ki khynnah skul.
