Agartala, Lber:
U Myntri Rangbah jong ka Tripura, u Manik Saha, u la pynpaw ïa ka jingsngewskhem ba ka seng Bharatiya Janata Party (BJP) kan bat ïa ka shuki ha ka Ïingdorbar Dharmanagar ha ka elekshon shiteng samoi kaba la buh ban long ha ka 9 tarik, Ïaïong, da kaba pynshong nongrim ha ka jingïadei jong u kyrtong jong ka bad ka jingkhlaiñ jong ka seng.
U Saha u la ïathuh ba ki nongïalam pdeng jong ka seng ki la pynbna ïa u Jawahar Chakraborty kum u kyrtong jong ka, da kaba batai ïa u kum u nongbud jong ka seng BJP uba la slem bha bad uba don ka jingïadei kaba khlaiñ bad ki riewlum.
“Haba nga ju leit sha Dharmanagar na ka bynta ki kam ha ka seng, nga ju leit ryngkat bad u da ka kali arshaka jong u. Ka longïing jong u ka ïatreilang bad ka BJP. Ki briew jong ka Dharmanagar ki tip ïa u, kaba long ka jingmyntoi ïa ngi,” u la ong bad bynrap, “kam don jingartatien” halor ka jingkyrmen jong ka seng.
U Myntri Rangbah u la pyni ba kane ka elekshon shiteng samoi ka don ka jingmut kaba kongsan bha namar ba ka seng ka peit ban pynskhem ïa ka kyrdan jong ka ha ka ïingdorbar thawaiñ jong ka jylla. U la ong ba ka BJP ka shimkhia ïa man la ka elekshon bad ka pynkhreh ha kajuh ka por ïa ka elekshon District Council kaba la pynbna ruh. “Ngi la trei ïa ka roi ka par hapoh ka jingïalam u Myntri Rangbahduh ka ri u Narendra Modi. Da kine ki kam pynroi ngin leit sha ki paidbah”, u la ong.
Haba ïadei bad ka liang pyrshah, u Saha u la kdew ba ka CPI(M) ka la buh kyrtong, katba ka Congress kaba la ïakhun kham mynshwa, ka “kynduh jingeh” ha kane ka kynti. U la pynskhem ba ka jingjied kyrtong jong ka BJP kan ai jingmyntoi ïa ka. “Kane kan nym long ka jingeh ïa ngi, namar ngi la ai ïa u kyrtong uba tbit bha, bad ngin jop ïa kane ka shuki”, u la ong.
Halor ka elekshon komiti shnong, u Saha u la ong ba ka jylla ka la pynbor ban buh kyrpang ïa ka por, da kaba kdew ïa ki jingeh ha ka liang ka jingpynpoi marbam.
U la pynpaw biang ba ka jingpynlong lang ïa ka vote jong ka Village Committee bad ka Autonomous District Council kan wanrah ïa ka jingeh, bad u la kdew ruh ïa ka aïom Lyiur kum kawei na ki daw kiba ju pynmih jingeh.
“Ngi la ai jingmut ban pynlong ha u bnai Nailur namar ka jingjur jong u slap, uba sah haduh u bnai Nailar”, u la ong bad bynrap ba kane ka kam ka dang don ha ka jingbishar jong ka Supreme Court hadien ki jingkylli halor ka por.
