Shillong, Lber 20
Ki jingïakhun Semi Final jong ka lympung Big FM’s Big Futsal Fest 2026 ki la pynhun shisha ïa baroh ki ba apkhmih lynti, bad pyni ïa ka jingbha shibun jong ka jingïalehkai futsal lyngba ki ar tylli ki jinglehkai ha kane ka sngi, ka jingïakhun kaba pyndonkam ïa ka sap, ka jingsted, bad ka buit kaba stad. Ki paidbah kiba la wan pyndap ïa ka madan ha ki jaka peitkai ha Langkyrding ki la ïohi ïa ki jingïakhun kiba pynlyngngoh bad pynshongshit ïa kiba wan kyrshan bad kumjuh ïa kiba wan khmih pynbyrngia.
Ha ka Semi Final kaba nyngkong, ka S10 Healthcare ka la ïakhun pyrshah ïa ka Meghalaya Secretariat Home Guards. Kane ka dei ka jingïakhun kaba ïapher bha ka rukom ïalehkai hapdeng ka bynta jong ka kylla step bad ka kylla miet. Ka Home Guards hadien ba ki la shah tam kol ha ka kylla step, ki la wan phai biang sha madan da ka jingkut jingmut kaba khlain bad kaba thymmai. Watla katta, ka jingpyrshang jong ki ha kaba kut kam pat biang ban pynioh jingjop, ha kaba ka S10 Healthcare ka la jop noh da 5-2 kol. U Russell Lyngdoh Nongkynrih u la ïoh da ka hat-trick ha kane ka jingïakhun.
Ka Semi-Final kaba ar pat ka dei ka jingïalehkai hapdeng ka Shillong Police FT pyrshah ïa ka Meghalaya Legislative Assembly. Ka Shillong Police, kiba la paw kum kiba long donbok ha kane ka lympung, ki la pyni ïa ka jingshaniah bad ka jingïatylli kaba khraw. Watla ka Assembly ka la ïaleh tyngeh, hynrei ka Shillong Police ka la lah ban kham lehkai bha ha ki por kiba donkam, bad pynlong ïa ka jingjop kaba skhem ban rung sha ka phainal. Ha kaba kut ka jingïalehkai ka Shillong Police ka la jop noh da 3-1 kol ïa ka Meghalaya Legislative Assembly.
Ka S10 Healthcare kan ïakhun pyrshah ha ka final ïa ka Shillong Police FT ha ka por 5 baje janmiet – kine ki dei ki ar tylli ki kynhun kiba ïaineh bad kiba pynshongshit tam ha kane ka lympung. Baroh ki nongkyrshan ki khmih lynti ïa ka jingïakhun kaba khlain bor bad itynnad shibun hapdeng kine ki khlur ka futsal ban ïoh ïa ka nam lahduh jong ka lympung Inter Office Futsal kaba ar ha Shillong.
Katba ka ‘3rd Place Match’ ka ban don shuwa ka jinglehkai final kan long hapdeng ka Meghalaya Secretariat Home Guards pyrshah ïa ka Meghalaya Legislative Assembly. La khot sngewbha ïa baroh ban wan sakhi ïa kane ka sngi kaba khraw bad ban pynphuh pynphieng ïa ka mynsiem ïalehkai futsal.
