Shillong, Lber 22
Ka jingangnud kaba la slem bha jong ka Meghalaya Football Association, kumjuh ki riew ïeid phutbol lem bad ki nongïalehkai barim, ka la wan urlong ha kaba ha ka sngi Saitjaiñ la lah ban plie ïa ka shlem ai jinghikai ne ka MFA Academy ha madan Third Ground, Polo bad ka jingthmu jong kane ka long ban kyntiew ïa ka jingïalehkai phutbol ha ka Jylla bad ruh ban pynmih ïa ki nongïalehkai ki ban mihkhmat ïa ka Jylla ha ki snem ban wan.
Ka jingplie ïa kane ka shlem ai jinghikai phutbol ka long ruh ha ka jingrakhe ïa ka Jubili Ksiar jong ka MFA bad na ka liang ka council jong kane ka synjuk ka la mynjur lang ban rakhe ïa kane ka jingdap 50 snem da kaba saiñ dur ïa ki heprit ki ban long kawei ha ka jingïalehkai phutbol jong ki snem ki ban wan.
Hapoh kane ka shlem ai jinghikai la lah ban pynrung haduh 60 ngut ki khynnah shynrang ha kaba la phiah ïa ki ha la ki jong ki kyrdan kata ka U-12 bad U-14. Ki la don palat 300 ngut ki khynnah kiba wan sha ka jingpyrshang kaba la dep ban pynlong kham hashwa bad hadien la jied sa tang 60 ngut na ka bynta ban ïoh ka jingshah hikai na ki coach kiba kynthup ïa u Playerson Syiemlieh, Amit Rai, Subir Dey, Seibor Sana bad Bah Bobby L Nongbet.
Ha katei ka sngi plie ïa ka shlem ai jinghikai, la ïadon lang ruh u President ka MFA u Bah Hamletson Dohling ryngkat ki dkhot kane ka synjuk. Haba ai jingkren ha katei ka jingïalang, u Bah Dohling u la ong ba ka MFA ka kwah ban ïohi shuh shuh ïa ki nongïalehkai na kane ka Jylla ba kin poi sha ka Indian Super League bad ruh ban ïoh rung hapoh ka kynhun ïalehkai ka ri. Te kumta u la pynshlur ïa ki khynnah kiba don ha ka rta kaba naduh 10 haduh 13 snem, ba kin long kiba don ïa ka jingangnud, kiba pynleit jingmut bad kiba aiti lut met bad mynsiem khnang ba kin lah ban pynurlong ïa ki jingangnud jong ki.
Kumba ka long mynta ka jingmaramot ha madan Third Ground ka dangïaid shaphrang, ha kaba na ka liang u Vice-President ka synjuk u Bah Cliff Nongrum, uba dei ruh u nongapkol barim jong ka Jylla, u la ong ba ynda la dep kine ka MFA ka kyrmen ban pynlong ïa kane ka shlem ai jinghikai kum ka jaka kaba pura ryngkat bad ki lad ban pynbiang ïa ki jaka sah na ka bynta ki khynnah kiba nabar ka nongbah Shillong, ryngkat bad ki baibam (scholarship) bad ka jinghikai kaba bniah bad ruh ban plie lad ïa ka shlem ai jinghikai sa ïa ki khynnah kynthei.
“Ki dangdon tang khyndiat ngut eh ki rangïalehkai kiba n aka Jylla kiba la ïoh ban shim bynta ha ka ISL, haba ïanujor bad ka Mizoram bad Manipur,” la bynrap u Bah Nongrum da kaba ong, “Ngi donkam ban saiñ dur bha ïa ki khynnah tad haduh ba kin da lah ban kiew shaduh ka kyrdan senior.”
