Bengaluru, Lber:
Ka jingkiew kaba pynsngewsih ha ki jingjia aksiden jong ki bos shimet ha kine ki hynriew snem ba la dep ka la pynmih ïa ki jingsngewkhia kiba jur bha shaphang ka jingpynjari ïa ka jingshngaiñ ha surok, ka jingsumar ïa ki kali, bad ka jingkitkhlieh jong ki nongpynïaid ha Karnataka.
Katkum ki jingtip kiba don bad ka TNIE, baroh 3,823 tylli ki jingjia aksiden kiba ïadei bad ki bos shimet la pyntip hapdeng u snem 2020 bad 2025. Ki jingtip ki pynpaw ïa ka jingkiew kaba ïaid beit bad kaba shyrkhei ha baroh ki kyndon jong ki jingjia aksiden, ki jingïap bad ki jingmynsaw. Kine ki jingjia ki la pynïap ïa 1,127 ngut ki briew bad 7,149 ngut ki briew ki la mynsaw, kaba kdew sha ka jingeh kaba nang kiew ha ka jingshngaiñ jong ki paidbah. Na ki 335 tylli ki jingjia aksiden ha u snem 2020 sha ki 847 tylli ha u snem 2025, ki jingkheiñ ki la kiew palat ar shah kaba pyni ïa ka jingkiew kaba phylla kaba 153%. Ki jingïap ruh ki la kiew palat 120%, katba ki jingmynsaw ki la kiew haduh lai shah ha kajuh ka por. Ki heh sorkar bad ki riew shemphang ha ka liang ka jingshngaiï ha surok ki pynshong nongrim ïa ka jingkiew ha ka jingkhleh lang jong ka jingbym shimkhia jong ki nongñiah kali, ki jingduna ha ka liang ka jingstad, bad ka jingpynkheiñ bunsien ïa ki kyndon pynïaid kali.
“Ka don ka jingdonkam kaba shai ban buddien kham pyrkhing, kynthup ïa ka jingbuddien ha ka por ba shisha ïa ki bos shimet, ki jingpeit bniah ba kyndit, bad ka jingpynshitom kaba kham tyngeh ïa ki nongleh kam sniew biang,” ong u Madhu, u riew shemphang ha ka liang ka leit ka wan na Mysuru. Ka jingkiew stet jong ki jingmynsaw na ka 675 ha u snem 2020 sha ka 1,803 ha u snem 2025 ka pynpaw ïa ka jingma kaba nang kiew kaba ki nongleit nongwan man ka sngi ki ïakynduh.
