Ha Meghalaya Energy Corporation Limited (MeECL) ka dei kawei na ki shlem kaba donkam bha namar lyngba jong ka, ba ngi kum ki nongshong shnong ngi ïoh ym tang ïa ka jingshai hynrei ha kum kane ka juk kaba mynta, ngi lah ban pyndep ïa kiba bun ki kam ki jam lyngba ka bording. Hynrei kumba ka long mynta, kum ki paid nongshong shnong ki la mad ka jingeh kaba khraw namar ka jingjur jong ka jinglip bording kaba la long khah khah, haduh ba ym ithuh ithaw shuh bad hateng hateng lei lei ka rukom treikam bad pynmeh bording ka la long da pyrdet, ka lip ha ka por ba sdang kem dum bad meh pat ha ka por ba shai ka bneng.
Dang ha kine ki bnai, ki taïew bad ki sngi kiba la leit, la sakhi ba ki paid nongshong shnong jong ka sor Shillong bad ruh wat ki shnong ba markhap ki la ud la lynïar namar ka jingjur palat jong ka jinglip ka bording ilektrik kaba khah khah bad kaba la neh ruh da ki bun bun kynta. Kane ka jinglip bording ka la ktah jur ïa ki briew kiba treikam da ka bording bad khamtam lei ïa ki khynnah skul bad ki samla pule kiba dang don hapdeng jong ka eksamin.
Ngim lah shuh ban tip ïa ka daw tynrai halor ka jingpynlip bording kaba khah khah namar wat lada ka bneng ka shai bad shit khlem u slap ne ka lyer ruh ka lip katno tam lei lada hap slap ryngkat ka lyer ba jur. Watla ym shym don kata ka ‘load shedding’ hynrei ka rukom pynlip ïa ka bording, ka paw thik kumba don ka ‘load shedding’ namar kam dei ba ka lip tang teng khat lano hynrei jan manla ka sngi. Lah ban kynmaw ba dang ha kine ki khyndiat bnai na ka liang jong u Myntri Rangbah ka Jylla ruh u la dep ban pynshai halor ka jingpynlip bording da kaba ong kam dei satia ka ‘load shedding’ hynrei ka dei namar ba ka dang don ka jingpyntreikam ïa ka skhim RDSS bad ka jingpynïeng ne bujli ïa ki transformer.
Haba don ka jingpynlip bording, kawei na ki bynta kaba pynbitar ïa ki paidbah ka long ba ki shem jingeh ban wad jingtip ne kylli pyrthew halor ka jinglip ka bording namar haba phone sha kiba dei ban pyntip ruh ym ju kham ïoh satia bad lada ïoh ruh ka jubab ka long ba ki dang phah peit ne phah wad ïa kata ka jingthut hangno ka don. Katkum ka jinglap, la sngewthuh ba ka jingduh bording khah khah ka dei ruh namar ka jingduna jong ki nongtrei kiba dei khmih bad ban leit wad ïa kata ka jingsniew ne dkut jong ki waiar.
Halor kine ki jingeh kaba kum ki nongshong shnong ki mad, ka la donkam ïa ka MeECL ba kan wad ïa ki daw tynrai bad khamtam lei na ka liang jong u Myntri ba dei khmih ïa ka tnad bording ban shimkhia mardor halor kane ka bynta bad ba kumno yn lah ban weng ïa kane ka bynta kaba dei kawei na ki jingeh kaba pyndkoh lut ïa baroh ki kam ki jam namar ha kum kane ka juk kaba mynta, ngi sakhi ba jan baroh ki kam ki jam, la treikam beit da ka bording. Kumta lada duh bording, la duh lut baroh ki kam. Kaba sngewthamula pat ka long ba watla ka bording ka lip khah khah, hynrei haba wan poi ka bill light ne ka bai bording pat, kam hiar satia hynrei ka kiew pynban. Kane ka dei ka bynta kaba kum ki paidbah ki shem jingeh shi katdei eh ban sngewthuh. Ka MeECL ka dei ban pynshai bha halor kane, ba balei ka long kumta.
