Agartala, Lber:
Ka seng Bharatiya Janata Party (BJP) ha Tripura, ka la pynjur ïa ka jingpynkhreh jong ka, na ka bynta ka elekshon ban wan sha ka Tripura Tribal Areas Autonomous District Council (TTAADC), ha kaba katei ka seng, ka la khmih lynti ba shen, kan sa pynbna noh ïa ka thup kyrteng jong ki kyrtong jong ka.
Ki tyllong khubor jong ka seng ki la pynpaw ba ki jingïalang hapoh ka seng ki dang ïaid shakhmat ban pyndep ïa ki buit treikam ha ka elekshon bad ban ithuh ïa ki kyrtong kiba biang, da kaba pynleit jingmut ha ki riew shimet kiba don ïa ka jingïadei kaba khlaiñ bad ki nongshong shnong bad ka dur paidbah kaba khuid.
Ïa kane ka elekshon TTAADC la ïohi ba ka dei kaba don jingmut ha ka saiñ pyrthei, ha kaba u Myntri Rangbah ka jylla u Manik Saha kham mynshwa u la pynpaw ba ka seng ka thmu ban ïakhun ha baroh ki seat bad ban pynkhlaiñ ïa ka jingdon jong ka ha ka Tribal Belt.
Katba ka jingïatreilang hapdeng ka BJP bad ka Tipra Motha Party kaba synshar mynta ïa ka konsil, ka paw ba kam tikna namar ba baroh ar tylli ki seng ki nang pynjur ïa ka jingpyrshang laitluid ban pynskhem ïa ki nongkyrshan jong ki.
Ha kawei pat ka khubor kaba ïadei bad kane, u National General Secretary ka BJP u Tarun Chugh bad u National Secretary u Vinod Sonkar kiba don ha ka jingwan jngoh ïa ka Jylla, ki la ïakynduh ïa u Myntri Rangbah ka Jylla u Manik Saha ha Agartala. U Myntri Rangbah u la batai ïa ka jingïakren kum kaba “don jingmut bad kaba pynmih jingmyntoi,” kaba pynleit jingmut ha ki kam seng bad ki jingthmu pynroi.
Ki nongïalam jong ka sorkar pdeng ki la pynlong ruh ïa ka jingïakren bad ki nongïalam ka jylla ha State Guest House, ha kaba la ïadonlang u Lamphang ka Ïingdorbar Thaw Assembly u Rampada Jamatia, ki Myntri u Tinku Roy bad u Kishor Barman, ryngkat kiwei pat ki nongbud jong ka seng.
Kawei pat ka jingïalang kaba kongsan la buh ban long ha Shaheed Bhagat Singh Yuva Awaas, ha kaba la khmih lynti ba ki jingïakren kin long halor ka buit thep vote bad ka jingjied ïa ki kyrtong ha shwa ka elekshon kaba la buh ban long ha ka 12 tarik u Ïaïong.
Katkum ka jingkheiñ jong ka State Election Commission, baroh ki nongthep vote kiba lah ban ïashim bynta ki long 9,62,697 ngut ha kylleng ki 28 tylli ki konstitwensi, ha kaba ka jingthep vote kan long ha ki 1,257 tylli ki station. Ka jingïiew ïa ki vote kan long ha ka 17 tarik Ïaïong.
