Shillong, Lber 22
U Samla Donald V Thabah General Secretary ka Khasi Students Union u la ong ba ka Jylla Meghalaya ka long ba khatduh ha ka thaiñ shatei lam mihngi bad ba lai ha ka ri India ha ka jinghiar jong ka ïoh ka kot ka Jylla.
Ka jinghiar jong ka ïoh ka kot ka Jylla ka ktah ha kiba bun ki liang khamtam ha ka ïoh kam ïoh jam ki khun samla ka Jylla, kaba la pynlong ïa ki khun samla ban wat kam wat jam shabar ka Jylla, hynrei kaba sngewsih ka long ba ki shah pynngop ha ki briew ba nabar kiba kular ban aikam katba ki ngat pat ha ki kam pohjait.
“Ki briew jongngi haba ki poi ha Delhi ne Bangaloru ki hap ban trei beit ïa kano-kano kam namar ymdon ba ithuh ithaw ïa ki bad ki ban ïarap ba kin lait, kane ka ktah bha ïa ka jaitbynriew ka jong ngi” la ong u Samla Donald.
U la pynkynmaw ba dang ha ka 17 tarik Lber 2026 ki ar ngut ki samla kynthei na ri lum Jaiñtia ki la shah kular ai kam ha ki briew kiba nabar, katba haba ki la poi ha ki jaka, ki shah pyntrei ha ki kam bym ïahap kumba ki la kular bad ki shah pynbor ba kin trei ha ka kam khaïi met.
Shuh-shuh u la ong, ha kiba kum kine ki jingjia ka KSU Delhi units bad Bangaloru unit na ka por sha ka por ka ju ïarap ban pynlait ïa ki samla Khasi kiba ngat ha kum kine ki apot.
Kum ban shu kdew haba ïadei kane ka jingjia Khasi Students Union (KSU) Delhi Unit ryngkat ka jingïatreilang bad ka Special Police Unit for North East Region (SPUNER), ki la ïoh ban pyllait ïa ki arngut ki khynnah kynthei Khasi-Pnar kiba la ngat ha ka jingriam jong ki nongkhaïi briew kiba thok da kaba kular ai kam. Kine ki arngut ki khynnah, iwei iba dang 15 snem ka rta bad iwei iba 18 snem, kiba dei na East Jaintia Hills.
