Shillong, Lber 22
Ha ka step jong 22 tarik u Lber, 2026, ki katto-katne ki nongshong shnong ka Umphyrnai haba ki la mih na la ïing ban leit sha la ki kam ki jingtrei jong ki, kumba ha ka por 6 shiteng ei-ei, ki la ïohi ïa ka kali kaba la kylla lyndang ha ka jaka ba long them harud surok katei ka shnong.
Haba ki la leit hajan la lap sa ïa u briew uba la ïap hajan katei kali bad kumta mar-mar ki la pyntip noh sha ki nongïalam shnong kiba la pyntip sha ki bor pulit ka Madanriting Police Station.
Ia une u briew la wan kit noh da ka Ambulance sha Civil Hospital, Shillong bad ki dang wad ïa kiba ha ïing jong u.
Halor kane ka jingjia la suba ba katei ka kali Grand i10 kaba don ïa u Registration Number ML05 Q 0505, ka dei kaba dang wan na ka surok Umphyrnai sha Shillong.
Shuh shuh na katei ka kali la lap ïa ka Aadhaar Card kaba don ïa ka kyrteng briew B Baggio K Shadap uba dei na Ummulong, West Jaiñtia Hills District.
Ha kane ka bynta, ka surok ka dei kaba khongwaiñ bha bad ym shym don jingker harud jong ka bad ka jingjia hap ka kali ha katei ka bynta ka dei kaba la bunsien bad shim ruh bun tylli ki jingim jong ki briew.
Ki rangbah na katei ka shnong ki la ïathuh ba naduh ba la don ki jingjia hap kali ha katei ka jaka, kham ha shuwa, ki la phah jingthoh sha ka tnad PWD ban ker ïa ka tei ka rud surok hynrei la lai snem kim leh ei-ei.
Ki la ong ba ka tnad PWD ka la dei ban shimkhia bad lada ym lah ban ker da ki jingker nar ruh la dei ban ker da ki kynroh maw rel, khnang ban lait na kano-kano ka jingjia ba sngewsih.
La ong ba ka jinghap katei ka kali ha katei ka jaka ka dei kaba naduh ka miet ba la dep bad u nongñiah imat u la ïaksaid ban lait hynrei namar bym don ba ïohi ne ïarap ïa u, u la khlad noh ha katei ka jaka na ka jingmynsaw.
Ki rangbah ki kdew ba lada don ka jingker bad lada don ka jingleit tynrah kali ruh la lah ban ithuh ne lap ban ïarap hynrei ka dei jaka kaba them bad ym don ba ïohi kumta u tei u nongñiah hapdeng ka jingksaid ban lait im pynban ka la jia noh ka kaba sniewbok ïa u.
