Jowai, Lber 22
Ka mat ïakren ne ka ‘Motion’ kaba la wanrah da u MDC ka Congress na Saphai-Sahsniang, u Bah Rikut N. Parien ba kumno ban shim ki lad ki lynti ban ïada bad pynneh ïa ka jaidbynriew Jaiñtia ka la thap khluit hadien ba u CEM, Bah Thombor Shiwat u la kynnoh ba don ka jingthmu ban pynjah ïa ka Jaiñtia da u nongïalam ka seng saiñ pyrthei, Voice of the People Party (VPP), Bah Ardent Miller Basaïawmoit.
Ïa kane ‘Motion’ la wanrah ha ka Sngi pynkut ïa ka Dorbar Mang Tyngka ha ka 20 tarik Lber.
U CEM u la kynnoh ba u nongïalam ka VPP u la pynjah ïa ka Jaiñtia ha ka Dorbar Mang Tyngka ka Sorkar Jylla bad ha ka jingïalang ‘Rally’ ha Smit ba don kiba kwah ban rwai Ri-Khasi Ri-Jaiñtia, u President ka VPP u la ong, kajuh hi ngin rwai shuwa Ri-Khasi Ri-Khasi.
Kumta kane ka don ka jingma ïa ki Pnar ne Jaiñtia namar ba ïa kane ka Council la ïoh ha ka kyrteng jong ka Jaiñtia Hills Autonomous District Council.
U CEM u la pynpaw ïa ka jingsngewkhia halor kane bad u la khot ïa baroh ban ïatreilang ban pynneh ïa ka burom ka Jaiñtia bad khamtam ki para-MDC ba lada ki don kino-kino ki kot ki sla ne jingtip ban kyrshan ïa ki kyndon aiñ ban pynbha ïa ka ‘Lineage Act’ ban long kiba ïatreilang khlem da don ïa ka jingsngew seng ban pynneh-pynsah ïa ka jingithuh kum ki nong Jaiñtia.
U Dy. CEM uba dei ruh u EM In-charge Arts and Culture, u Bah Lasky u la ong ban pynkhlaiñ bad ban pynbha ïa ka riti ka dustur, ka Council ka la pyrshang da kaba pynkhlaiñ ïa ka tnad Arts and Culture bad wanrah ruh ïa ki dak thoh Pnar bad pynkhreh ban tyrwa sha ki skul.
U la ïathuh ruh ba ka tnad Political ka la pyrshang ruh ban sdang ïa ka wat ban nyngkong ban ithuh ïa ki kur bad ïa ki Dolloi la bthah ïa ki ban aiti ïa ka rukom pynïaid Elaka bad ki riti ki dustur.
U la ong ba haduh mynta ki Dolloi kim pat lah satia ban pynpoi ïa ka kolshor bad ka riti ka dustur ban pynlong aiñ.
Na ka liang u nongïalam Liang Pyrshah, u Bah Andrew Shullai u la dawa ban pyndam ïa kine ki jingkren u CEM na ka ‘Proceeding’ jong ka Ïingdorbar ne ‘Expunge’, hynrei na ka liang u Chairman, Dr. Sankey Shangpung u la shim ïa ka rai ba kum kine ki jingkren kim dei ban jia nangne shakhmat ne ban kren saiñ pyrthei.
