New Delhi, Lber:
Ki bor pahara ki la ïoh kurup ïa ka jaka buh tiar ïaleh, ki kuli, bad ki tiar pynbthei kiba bun ha ka por ba ki ïatreilang ha kylleng ki distrik jong ka Manipur, la ïathuh ki heh sorkar.
Ki jinglap, kiba la lap ha ka 20 tarik u Lber, ki kynthup ym duna ïa ka 29 tylli ki tiar siat, 50 tylli ki tiar pynbthei (IED), ki bom, bad kiwei kiwei ki tiar kiba long kum ki tiar thma na baroh ar ki thaiñ lum bad them.
Ha ka thaiñ Wabagai Turel Mamei jong ka Kakching distrik, ki bor pahara ki la ïoh ban kurup 6 tylli ki tiar siat, kynthup ïa kawei ka suloi AK-56, ryngkat lai tylli ki bom kawang kti bad ki tiar siat. Ha Tengnoupal distrik, la ïoh ban kurup 29 tylli ki bom IED, 5 tylli ki bom kawang kti, ki Electric Detonators, bad kiwei kiwei ki tiar pynbthei na ki shnong Loisi bad Saivom.
La ïoh ban kurup shuh shuh na ki thaiñ Lamdeng bad Kameng ha Imphal West distrik, ha kaba la ïoh kurup 11 tylli ki suloi, 85 tylli ki kuli bym pat pyndonkam, ki Camouflage Bulletproof Vest, bad kiwei kiwei ki tiar siat.
Ha ki jingkhynra ba kyrpang ha Tengnoupal, kynthup ïa ki jaka kiba hap hapoh Machi Police Station bad hajan u pud India-Myanmar ha ka shnong Yangoubung, ki bor pahara ki la ïoh ban kurup shuh shuh ïa ki bom IED, ki pistol, kawei ka jingsiat bom bad ki kor ai jingpyntip. Baroh ki tiar pynbthei la pynduh pyndam noh da kaba suk da kaba bud ïa ki rukom treikam ba la buh.
La ïoh kurup shuh shuh na ki kjat jong u lum Tekcham Sanji Ching ha ka District Thoubal, ha kaba la ïoh kurup san tylli ki tiar siat bad ki kuli.
Ka jingpahara ka la nang jur ha Manipur naduh ba la mih ka jingïakynad hapdeng ki jaitbynriew ha u Jymmang 2023 hapdeng ki kynhun Meitei bad Kuki-Zo. Ka jingïakynad haduh mynta ka la shim ïa palat 260 ngut ki briew bad pynkynriah jaka ïa ki hajar ngut, kaba la pynlong ïa ki jingwad bad jingwad bniah ban bteng ban pynphai biang ïa ka jinglong jingman.
