Shillong, Lber 22
Ka jingshah thok ki samla kynthei na East Jaiñtia Hills ka la sdang ban jur bha ka dei hadien ba la shah ktah na ka jingkhang dewïong kat haduh ba kin poi sha ki jaka die met sha nongbah Delhi.
Kane ka la paw pyrthei hadien ba ki nongïalam ka Khasi Students Union (KSU) Delhi Unit ki la ïoh ban pyllait im ïa bun ngut ki samla kynthei kiba la poi sha ki jaka die met.
Haba ïoh ban ïakren bad u samla Nicholas Chyrmang uba dei u Secretary ka KSU Delhi Unit u la pynpaw ka jingsngewsih ban tip ba ki kynthei kiba la ngat ha ki kam thok ban ai kam ki dei beit na East Jaiñtia Hills.
U la ïathuh ba kane ka jingshah thok ka dei namar ba kim don kam shuh ha katei ka thaiñ naduh ba la khang dewïong kumta ki la shah thok haba don kiba kular aikam.
U la pynpaw ka jingsngewsih ba kine kiba thok ki dei ki Khasi kiba la trei slem sha Delhi kiba donkti ban ïalam ïa ki.
“Nga sngew dom ïa ki kmie ki kpa namar kim da sneng bha ïa ki khun haba barabor ngi la dep pyntip ba kim dei ban ngeit ha ka jingkular aikam sha Delhi hynrei bun kim sngap,” u la ong.
Shuh shuh u la ïathuh ba 60 percent ki dei na East Jaiñtia Hills kiba shah pynngop ban poi sha ki jaka die met ha Delhi da kaba shah kular ban aikam haduh 40 hajar tyngka haduh 50 hajar tyngka.
“Wat ma ngi ba la trei slem sha Delhi ngim pat ïoh haduh 40 hajar tyngka hynrei sngewlyngngoh ba kine ki samla ki la shah kular thok ha kiba kular aikam,” u la ong biang.
U samla Nicholas u la pyntip ba mynta kine kiba thok aikam ki la ïalam sha kiwei ki jylla kum ha Rajasthan, Gujarat, Punjab kaba pynjynjar ïa ki nongïalam ka KSU Delhi unit ban buddien.
Kumta u la kyntu ïa ki nongmihkhmat katei ka thaiñ ba kin shimkhia ban pynlong ïa ka jingai jinghikai ïa ki samla ba kin kiar na kane ka jingshah kular thok ban aikam sha Delhi.
U la kyntu ïa ki kmie ki kpa ba kim dei ban shah ïa ki khun ban leit bylla sha Delhi khlem da tip thikna namar ka buh jingeh ïa ki hadien habud.
Kum ban shu pynkynmaw, ka Khasi Students’ Union (KSU) Delhi Unit, ka la ïoh ban phah noh ïa ki ar ngut ki khynnah kynthei sha shnong jong ki kaba la buhrieh ïa ka kyrteng kaba hap ha East Jaiñtia Hills mynha ka 20 tarik mynta u bnai hadien ba ki la ïoh ban pyllait im na ki briew kiba phah sha ka kam die met kaba ki la poi ha kawei ka jaka khem met ha Haryana.
