Nongstoiñ, Lber 22
Ka jingangnud jong ki paidbah nongshong shnong ka thaiñ Sien-duli, West Khasi Hills ban ïoh noh ïa ka jaka sumar kaba bha lane ka PHC shen kan sa urlong ha kaba mynta u bnai yn sa sdang noh ban pyntrei ïa kane ka jaka sumar.
Ïa kane la ong da u Bah Methodius Dkhar, MLA ka Mawshynrut ha kajuh ka por kum u Myntri Sorkar haba kren sha ki lad pathai khubor ha ka Sngi Thohdieng, hadien ba na ka liang jong u ha ryngkat ki ‘riewrangbah, ki longkmie katei ka thaiñ bad ki trai jaka kiba la ai sngewbha ki la ïa leit ban peit lang bad ka tnad ka koit ka khiah ïa katei ka jaka ban ai laiñ noh ïa ki kontraktor ban sdang ïa kane ka jingtei bad ka jingpyntrei ïa kane ka PHC.
“Ka jingangnud jong ki paidbah jong kane ka thaiñ ïa kane ka PHC ka dei kaba la slem bha bad ïa kane ka jaka la aiti ha ka tnad ka koit ka khiah naduh u 2012 bad ha kato ka por, na ka liang ki ‘riew rangbah, na ka por sha ka por ki la ïa buddien bad ki la don ruh ki por ba ngi la sngewduh jingkyrmen lehse ba ngin ïoh shuh ban shna ïa kane ka PHC hynrei ha u snem 2025, la ïoh ïa ka mang tyngka na ka bynta ban sdang noh ïa ka jingtrei,” ong u Bah Methodius.
U la ïathuh ruh ba ka mang tyngka kaba ïoh ka long T.8 klur tam kynthup ban shna ïa ka PHC bad ki jaka sah bad u la ong ruh ba la kumno-kumno ha une u bnai Lber hi, yn sdang noh ïa ka jingpyntrei.
U Bah Methodius u la pynpaw ruh da kaba ong ba kum u nongmihkhmat u pynpaw ïa ka jingsngewnguh ïa u Myntri Rangbah ka Sorkar Jylla bad u Myntri ka tnad ba dei peit uba la sngew lem ïa ka jingkyrpad jong u bad ki paidbah ka dong ka thaiñ na ka bynta katei ka jaka sumar.
Shuh shuh u la ai khublei ruh ïa ki trai jaka kiba la ai sngewbha ïa katei ka khyndew kaba heh kaba la bit la biang na ka bynta ban ïoh ban shna ïa kane ka PHC.
Ïa katei ka jaka ban tei ïa katei ka PHC la ai sngewbha da i Mei-ieid Lebina Kharbani – kaba don kumba 5 akar bad kaba dang hap ruh hapoh ka shnong Tum-Tum katkum ka jingïathuh jong u khun nyngkong i Mei-ieid Lebina, u Bah Maniksing Kharbani.
“Ngi kum ki trai jaka ngi da sngewdonbok mar ïa ïoh khet Myntri u Bah Methodios Dhkar uba la lah ban pynurlong ïa ka jingangnud ki paidbah ban ïoh noh ïa ka jaka sumar kaba biang ha kane ka thaiñ. Ngi la aiti ïa kane ka jaka sha ka Sorkar naduh u snem 2012 hynrei ha kito ki snem ka la shu sahkut khlem poi shaei-shaei ha kaba ngi la duh jingkyrmen hynrei mynta u snem lyngba ka jingtrei shitom u MLA ka thaiñ uba la long ruh u Myntri ha ka Sorkar, la shu ïohi kynsan ba shen yn sa pyntrei noh ïa ka PHC ha kane ka jaka,” ong u Bah Maniksing Kharbani.
Shuh shuh u la ong ba kum ki trai jaka ki sngewnguh ïa u MLA bad ha kajuh ka por u la kyntu ïa baroh ki Sordar shnong katei ka thaiñ ba kin dang ïai ai ka jingïatreilang na ka bynta ka bha ka miat jong ki paidbah nongshong-shnong.
Halor ka jingai sngewbha jong ki ïa ka jaka, u Bah Manik u la ong ba ka jingthmu jong ki haba ki ai ïa kane ka jaka ka long na ka bynta ka jingmyntoi jong ka dong ka thaiñ namar kumba ka long baroh shi katta ka don tang kawei ka Sub-Centre hapoh ka shnong Sienduli bad kaba la shem jingeh ban ai jingshakri ïa bun phew tylli ki shnong ha kane ka thaiñ bad lyngba ka jingurlong kane ka projek tei PHC kan sa long ka jingkyrkhu ïa ki paidbah ka dong ka thaiñ.
Ha kajuh ka por, u la kyntu ïa ka Sorkar ba kan pyrkhat lem ïa ki kum ki trai jaka da kaba ailad ban ïoh kino-kino ki kam ba ki kum ki trai jaka ki lah ban trei la ka long kawei ne ar lane lai tylli ka shong ha ka jinglah bad jingibit jong ka Sorkar.
