New Delhi, Lber:
Ka Myntri Rangbah jong ka Delhi ka Rekha Gupta ha ka sngi Thohdieng ka la plie ïa u mawnongrim na ka bynta ki katto katne ki jingthmu ba kongsan jong ka leit ka wan na ka Indraprastha Bus Depot, kaba long ka sienjam kaba kongsan sha ka jingpynïaid paidbah kaba ïaid beit bad kaba long katkum ka juk ba mynta ha ka nongbah.
Ka la pynher lama ïa ki 300 tylli ki bos elektrik bathymmai, ka la plie paidbah ïa ka jingshakri e-bus ba thymmai hapdeng ki jylla kaba pynïasoh ïa ka Nanaksar (Delhi) sha Ghaziabad, bad ka la buh ïa u mawnongrim na ka bynta ka ïing ophis ba bun mala jong ka Delhi Transport Corporation (DTC).
Ka Gupta ka la plie ruh ïa ka EV Incentive Portal bad u la khmih ïa ka jingai jingïarap palat T.24 klur sha ki 12,877 ngut ki nongïoh jingmyntoi lyngba ka Direct Benefit Transfer (DBT).
Kine ki jingthmu, ka la ong, ki long ban pynkhlaiñ ïa ka jingkylla jong ka Delhi sha ka rukom leit jingleit kaba khuid ba suba katkum kajuk ba mynta.
Ka la ong ba kine ki sienjam ki dei ki sienjam kiba kongsan ban tei ïa ka rukom kit paidbah kaba khuid, kaba bit dor, kaba shngaiñ bad kaba la pynkhreh na ka bynta ka lawei. Ka jingkit jingbah kaba pynkhuid, ka la kdew, kan ym ïarap tang ban pynduna ïa ka jingjaboh hynrei kan pynlong ruh ïa ka jingleit jingwan man ka sngi kaba kham suk ïa ki nongshong shnong.
Halor ki EV subsidy, ka Myntri Rangbah ka jylla u la ong ba watla la pynbna kham mynshwa hynrei ki nongïoh jingmyntoi kim shym la ïoh ïa ka jingsiew ha ka por kaba biang.
Ka sorkar kaba mynta ka la pynbeit ïa kane da kaba wanrah ïa ka rukom treikam kaba shai bad phah palat T.24 klur beit sha ki Account jong ki 12,877 ngut ki nongïoh jingmyntoi. Ka jingthmu ka long ban pynthikna ba ki nongshong shnong kin ïoh ïa ki jingmyntoi kiba ki dei hok ban ïoh ha ka por kaba biang, ka la bynrap.
