Shillong, Lber 22
Ka Nangrimingin Achik Dol (NAD) ka pynpaw ka jingpynrem jur ïa ki kam thombor, ki kam pyntieng pynsmiej bad ki kam beaiñ kiba dang ïai bteng da ki nongwan buhai shong beaiñ na Bangladesh pyrshah ïa ki jaitbynriew riewlum trai muluk jong ka Garo Hills ha Meghalaya.
Ka NAD ha ka kyrwoh ha ka 21 tarik u Lber 2026, ka la pynpaw ba ki la wan ki jingpyntip ba ki nongwan rung beaiñ kim shym la rung tang ha ka khyndew ka shyiap kiba dei jong ki trai ri trai muluk hynrei ki la pyrshang ban pynthud ïa ka shongsuk shong shngaiñ da kaba wanrah jingsngew ïapher jaitbynriew.
Kum kine ki kam ba thmu ban pynkhihwin, ban leh donbor bad ban pyntieng ki long ka jingma ïa ka riti synshar bad ïa ki hok tynrai jong ki jaitbynriew riewlum katkum ka Sixth Schedule jong ka riti synshar ka ri India, la ong ka NAD.
Ka NAD ka ngeit skhem ba ki jingïakynad ba dang shen kim dei kiba la jia hi hynrei ki dei ka jingmih na ka jingleh kine ki nongwan rung tuh ban pynthud ïa ka thaiñ bad ban pyntlot ïa ka jingïatylli jong ki trai ri trai muluk.
Ka NAD ka la kynnoh ba ka jingsngap jar bad jingbym leh eiei jong ki bor ba dei peit ha kaba ïadei bad ka jingwan rung beaiñ bad ki jingma kiba mih na ka, ka la nang pynshlur shuh-shuh ïa kum kine ki mynder.
Namarkata, ka NAD ka pynrem jur ruh ïa ka jingkem, ka jingshah ñion beiñ khlem daw jong ki nongïalam seng treimon sngewbha bad ki riew shimet da kaba ong ba ki la don hakhmat eh ban ïada ïa ka hok, ka jinglong kyrpang, bad ka khyndew ka shyiap jong ki trai ri trai muluk bad bynrap ba bunsien ki Aochik ki dei ki briew kiba ïeid ïa ka shongsuk shongshngaiñ.
Ka NAD ka dawa ban pyllait noh mardor khlem kyndon ïa baroh ki nongïalam seng treimon sngewbha bad ki riew shimet kiba la shah kem ha kaba ïadei bad ki jingïakhih ba dang shen, ka jingtohkit kaba bniah ïa kiba wan rung beaiñ na Bangladesh, ka jingbeh ïa ki mynder na Garo Hills bad kiwei-kiwei pat.
Shuh shuh ka la kyntu ïa ka Sorkar Jylla, ka Sorkar India, bad baroh ki bor ba don ka jingkitkhlieh ban leh da kaba kut jingmut bad ban bat ïa ka hok, ban pynthikna ba ka hok bad ka burom jong ki jaidbynriew trai ri kan ym shah pynthud.
