Shillong, Lber 22
Ka Mawphlang CC ka la pynliem noh ïa ka Mawmluh CC da 6 wiket bad ka la rung sha ka quarter final na ak Group-D ha ka lympung ïalehkai 5th District League T20 Cricket Tournament 2026 ba la pynlong da ka East Khasi Hills Cricket Association.
Ha kane ka lympung ha madan Saitsohpen kaba ha Sohra ha ka sngi Saitjaiñ, ka Mawphlang kaba la jop ïa ka kynting pisa ka la ailad ïa ka Mawmluh ban tied nyngkong ha kaba ka la kamai 137 run bad shah pynhap 8 wiket ha ki 20 over. U Teibansuk Sohkhlet u la khywit ïa ka shiteng spah kaba 50 run na ki 37 bol. Katba u Banbha u la khur 5 wiket na ka bynta 12 run ha ki 4 over.
Haba wan shimti ïa ka pali kaba ar, ka Mawphlang ka la lah ban kynjoh sha ka thong da kaba kamai 143 run bad shah pynhap 4 wiket ha ki 16.5 over. U Saiñdorlang Ripnar u la tied 45 run na ki 28 bol. Katba u Vijay Pathaw u la khur 2 wiket na ka bynta 34 run na ki 4 over. Ïa ka nam Player of the Match la khur da u Saiñdorlang Ripnar.
Lyngba kane ka nam jop, ka Mawphlang ka la ïoh ban lamkhmat na katei ka group ha kaba ka la kamai 6 poiñ, katba ka Saitsohpen ka la wan ha ka kyrdan ba-ar da kaba kamai 5 poiñ bad balai ka Mawmluh kaba la kamai 4 poiñ.
Haba phai sha kawei pat ka jingïakhun, ka Superkings (Sohïong) ka la jop da 9 wiket ïa ka Saitsohpen Veteran Legend. Ka Saitsohpen Veteran Legend kaba la shimti ban tied nyngkong ka la kamai 102 run bad shah pynkhyllem baroh ki nongtied ha ki 19.3 over. U Keithwill Lyngdoh u la tied 25 run na ki 20 bol. Katba u Lightstar Jana u la khur 3 wiket na ka bynta 18 run ha ki 4 over.
Haba wan beh ïa ka thong, ka Superkings (Sohïong) ka la kynjoh sha ka thong da kaba kamai 106 run bad shah pynhap 1 wiket ha ki 10.1 over. U Wenbestar Syiemïong u la tied 47 run na ki 28 bol. Katba u Keithwill Lyngdoh u la khur 1 wiket na ka bynta 17 wiket ha ki 3 over. Ïa ka nam Player of the Match la khur da u Wenbestar Syiemïong.
Watla ka Superkings (5 poiñ) ka la khur jingjop, hynrei ka danghap ban ïaknieh rung bad ka Seng Samla Mawriang (6 poiñ) kaba don ha ka kyrdan ba-ar. Katba ka Laitkynsew (10 poiñ) ka la ïoh ban bat ïa ka kyrdan ba hakhlieh na ka Group-C bad ka la rung sha ka quarter final.
