Shillong, Lber 22
Ka Voice of the People Party (VPP) ka la rai ban sei da u Dr. Batskhem Myrboh kum u kyrtong MP na Shillong Parlia-mentary Konstitwensi ha ka ilekshon Shiteng Samoi hadien ka jing-khlad noh u MP, u Dr. Ricky AJ Syngkon. Kane ka party khlem da pynslem, ka la hiar sha ka shnong Thangmaw, Eastern West Khasi Hills District, ban pynithuh ïa u kyrtong bad pan jingkyrshan na ki paidbah ka Mawthadraishan Konstitwensi.
Ha katei ka prokram la ïadonlang u Dr. Batskhem Myrboh, u MDC ka Pariong Mawthadraishan u Bah Powell Sohkhlet, u Treasurer ka party u Bah Grosper Ryntathiang, kiwei ki nongkitkam, u Sordar ka shnong lem bad kiwei-kiwei de.
U Dr. Batskhem haba kren ha katei ka jingïalang u la ong ba hashuwa ba un don bad ka VPP um pat ju ïadon bynta bad kano-kano ka seng saiñ hima, namar ba ki kyrtong bad ki party ki sam pisa sam kyaid ha ka por ilekshon.
U la ong ba u shitom ban shem ïa ki kyrtong ne ïa ki party kiba ïaid ha ka lynti jong ka jingshisha ka hok bad ka jingkhuid ha ka politik.
Nalor kata, u la ong ruh ba dei halor kane ka jingleh ba ki nongmihkhmat kim trei shuh na ka bynta u paidbah hynrei ki leh katba mon ynda ki la poi ha ka shuki.
“Ngam pat ju don bad kano-kano ka party seng saiñ hima sima ha ka Jylla bad hashuwa ban mih ka VPP ruh nga shem shitom ban leit thep vote namar ïa ki kyrtong, ki party ki ai pisa, ki sam kyaid bad kiwei-kiwei de. Kumta nga la kyntait lypa ban leit thep vote. Nga shem jynjar ban lap ïa ki kyrtong kiba ïaid shisha ha ka hok bad kata ka jingkhuid jingsuba,” la ong u Dr. Batskhem.
Namarkata, u la ong um shym la don ka jingthmu ban rung sha ka kam poitik ban ïakhun ïa ka ilekshon namar u sngewtynnad bha ha ka kam hikai hynrei na ka jingseng ïa ka VPP u la kubur ïalade ban rung lang sha kane ka party.
Hynrei u la pynkynmaw biang, ba u (L) Dr. Ricky u ju ong ïa u ba “Ka imlang ka sahlang ka donkam ïa phi bad ngam shym la pynleit jingmut ha ka por ba kren u Dr. Ricky Syngkon bad nga la kular pat sha ka party ba ngan trei shitom bad kane ka jingai jingshakri jong nga ka long kum shibynta ba ka imlang ka sahlang ka la ai ka jingnang ka jingstad ïa nga.”
