Shillong, Lber 22
Ki Nongtrei ba ju sar surok ha kylleng ka nongbah Shillong ki la pynpaw ba ki la ïakynduh jingeh shibun ban pyndap pynbiang ïa ki jingdonkam ha ki ïing ki sem ki jongki namar ka jingsahkut ka tulop jong naduh u bnai Nohprah jong u snem 2025.
Haba ïoh ban ïakren ïa ki katto katne ngut kiba trei ïa kane ka kam ban sar ïa ki surok ha nongbah Shillong kum ha Police Bazar, Motphran, Polo, Barik bad Laitumkhrah, ki pynpaw ba ki la ïakynduh jingeh ha ka ban pyndap ïa ki jingdonkam jongki kum ha ka bai bam, bai wai ïing bad kiwei ki jingdonkam.
U Bah Eribert Sun u ba dei peit ïa ka kynhun ba sar ha Laitumkhrah u la ïathuh kiba trei ïa kane ka kam ki la shem jingeh namarba ki don kiba la don khun don kti bad kiba wan na ki longïing longsem kiba shem jynjar bad pynpaw ïa ka jingbym sngew ïahap ba ki bor ba dei peit ki set tulop ïa ki nongtrei da ki bun bnai.
U la ïathuh ba na ka liang jong ki la leit ban kylli jingtip na ka ophis Municipal bad u kontraktor ba pyntrei ïa katei ka kam, hynrei kim shym la ïoh jingtip haei ka tulop jongki ka sahkut bad kaba la pynsah umdum bad buh ïa ki ha ka jingeh.
Ki la ïathuh ba ki la sdang ban trei ïa kane ka kam ban sar surok naduh u bnai ïaïong mynshem snem, “Ha kaba sdang ba ngi ïoh ban trei ïa kane ka kam ngi sngew kmen, namar ba ngi la ïoh ban kyrshan ïa ka ïing ka sem bad ki jingdonkam jong ngi, hynrei ka jingsah kut ka tulop ka la pynkhuslai mynsim ïa ngi” ki la ong.
Ki la buh ka jingkyrpad ïa ka Sorkar, ka tnad Municipal lane u kontraktor ban pynlait noh kham kloi ïa ka pisa ba ki dei ban ïoh namar ba ki la ïa kynduh jingeh palat na ka jingbym ïoh tulop.
