Guwahati, Lber:
Katba ka Assam ka dang pynkhreh na ka bynta ka elekshon sha ka 9 tarik Ïaïong, ka Congress ka la pynbna ïa ka jingïalap elekshon kaba jur bha, da kaba thmu ban ïakhun haduh 100 tylli ki konstitwensi bad ban ïatreilang bha bad ki seng synrop jong ka.
U president ka Assam Pradesh Congress Committee (APCC) u Gaurav Gogoi u la pynpaw ba ka seng ka la pyndep ïa ka jingpynbeit ïa ka jingïasam shuki, ha kaba 26 tylli ki konstitwensi la buh kyrpang na ka bynta ki paralok ba iatreilang ban pynkhlaiñ ïa ki vote pyrshah BJP.
“Ka Congress kan pynïeng kyrtong ha kumba 100 tylli ki seat, bad 26 tylli ki dei na ka bynta ki seng synrop jong ngi. Ha ki ar tylli na kine, kan don ka jingïakhun paralok”, la ong u Gogoi ha ki lad pathai khubor.
U la ong ba ka jingïatylli kaba nangroi hapdeng ki seng pyrshah ka pynkylla dur thymmai ïa ka saiñ pyrthei, kaba wanrah ïa ki jingeh kiba thymmai ïa ka BJP kaba synshar. Katkum ka jingong jong u, ki buit treikam ba mynshuwa jong ka BJP mynta ki don hapoh ka jingeh namar ki kynhun pyrshah ki wanrah ïa ka jingïatylli.
“Ka BJP kam shym la khmih lynti ba ki seng pyrshah kin ïasnohkti lang kumne.Mynta ki ïakynduh ïa ka jingeh kaba ïatylli hashwa ka elekshon”, u la bynrap.
U Gogoi u la ban jur ba kane ka jingïateh lok ka pynpaw ïa ka jingsngew jong ki paidbah ha Assam. “Ki briew ki kwah ïa ka jingpyrshah kaba ïatylli, bad ngi jubab ïa kata ka jingkhmih lynti”, u la pynkut.
