Bengaluru, Lber:
Ki nongïalam jong ka seng BJP na Karnataka ki la pynpaw ïa ka jingkmen halor ka jinglah shakri jong u Myntri Rangbahduh ka ri u Narendra Modi uba la long u khliehduh jong ka sorkar India uba la bat slem tam ha ka ri India da kaba pyndep ïa ka kam haduh 8,931 sngi.
Haba khot ïa u Modi kum u “nongïalam ba phylla”, u dkhot jong ka BJP National Parliamentary Board u BS Yediyurappa u la ong, “Ka jingaiti lut jong u ban shakri ïa ki briew kam tip ïa ka jingsangeh, kam tip ïa ka jingpynleit jingmut kaba lyngkot ha ka jingshongthait ne jinglehkai. Hato ka pyrthei ka la ju sakhi ba u la tuh ïa ka mynta na ka bynta ka kyrdan kum u Myntri Rangbah ne kum u Myntri Rangbahduh hapdeng kine ki jingshakri jong u ha ka kam? Da lei lei ruh em!
Namar u long u ‘Myntri Rangbahduh uba don ka kamram kaba kyntang,’ u nongtbeh jingshai uba la pynkhih da ka jingkular kaba khlem sangeh: ban kyntiew ïa ka ri ba ïeid eh jong ngi bad ki million ngut jong ka kiba khlem jingkheiñ na ki kynjri ba la buhrieh jong ka jingduk bad ka jingbymroi, da kaba shna ïa ki lynti phylla jong ka jingkiew bad jingroi sha ka jinglong ba jylliew jong ka ri India”.
U MP jong ka Chitradurga, u Govind Karjol u la ong, “Kine ki 8931 sngi ba la dep jong ka jingïalam jong u Modi lah ban lum lang kum kawei ka jingpyrshang kaba khraw ban pynduna ïa ka jingduk bad ka roi ka par.” bat ïa ka kyrdan nongïalam pyrthei ha ki sngi ban wan.
“Nga ngeit skhem ba un sa pynpra shuh shuh ïa ki rekod ha ki por ban wan ruh. U dei u dak ba im jong ka jingtrei shitom, ka jinglong ryntih bad ka jingpynroi ïa ka ri la ka long ha kaba buh ïa ki lad ki lynti na ka bynta ka roi ka par ne ban pynkhih ïa ki jingpyrshang ban kyntiew ïa kiba shah iehnoh beiñ bad kiba duk,” ong u Vijayendra ha ka jingïakren bad ki nongthoh khubor.
U LoP ha ka Council u Chalavadi Narayanswamy u la ong ba u Myntri Rangbahduh ka ri u Modi u dei u nongmuna ba im na ka bynta ka jaitbynriew baroh kawei bad u dei u nongmuna na ka bynta ki nongïalam ba mynta bad ki ban sa wan.
U MLC barim u ACP u Abdul Azeem u la ong, “Ka jingïaid lynti jong u Myntri Rangbahduh ka ri kaba 12 snem ha ka kam ka pynpaw ïa ka jingïatylli kaba duna jong ka jingsynshar kaba khlem sangeh bad ka jingaiti kaba khlem sangeh ha ka jingshakri paidbah.
