Shillong, Lber 23
U Bah Wailadmiki Shylla Myntri ka Tnad ka Koit ka Khiah ka Sorkar Jylla u la ong ba ym lah ban len ba ki don ki doktor ha ka Jylla, hynrei ka jingduna doktor ka kham jia bha ha ki thaiñ nongkyndong namar haba la pyllait pynrung kam ki doktor kim treh ban trei ha ki thaiñ nongkyndong.
U la ong ba mynshwa ki ju shaniah doktor na shabar, kumta na kane ka daw ba ka Sorkar ka pyrkhat bha ïa kane bad ka la rai ban wanrah ïa ka Shillong Medical College ha ka Jylla namar ba ka donkam pynmih bun ki doktor na ka Jylla.
U la ong ruh ba ka Sorkar ha une u snem ka lah ban sdang noh ïa ka Tura Medical College bad na kine ki College yn ïoh doktor ba na ka Jylla kumba 200-300 ngut man u snem bad kyrmen ba yn lah ruh ban pynkut noh ïa kane ka jingeh.
Shuh-shuh u la ong ba ka Jylla ka duna palat ïa ki doktor ‘Specialist’ namar ki don tang kumba 30% bad halor ka jingbym treh ki ‘Specialist’ ban wan trei ha ka Jylla, u la ong ba ïa kane ka kam donkam ban shong pyrkhat bha balei ba kim treh ban trei ha ka Jylla.
