Tehran, Lber:
Ka tnat shipai jong ka Iran, ha ka Sngi UBlei, ba kan khang dam noh syndon ia ka lynti ïaid jhad ka ‘Strait of Hormuz’ lada u President jong ka America- u Donald Trump u buh jingma ia ki kor bad ki shlem treikam ba kongsan jong ka Iran.
U Trump u la ai por 48 kynta ia ka Iran ban plie biang ia katei ka duriaw kaba la khang thikna naduh ba sdang ka thma ha ka 28 tarik u Rymphang da ka jingbthei bom ka US-Israel ia ka Iran.
Naduh katei ka por, katei ka thma, ka la saphriang kylleng ka Middle East, ha kaba ka Iran, ka la jubab da kaba thombor da ki drone bad ki namding, ia ki jingmyntoi jong ka Israel bad ka US ha katei ka thain.
“Lada pyntreikam ïa ki jingbyrngem jong ka United States ha kaba ïadei bad ki karkhana pynmih bor ding jong ka Iran… ka Strait of Hormuz kan khang lut, bad yn nym plie biang ïa ka tad haduh ban da shna biang ïa ki karkhana pynmih bor ding jong ngi kiba la shah pynjot,” ong u operational command jong ki shipai u Khatam Al-Anbiya ha ka kyrwoh.
Ki shipai jong ka Iran ki la ong ba kin hiar thma ruh ïa ki “karkhana pynmih bor ding, ka bor ding, bad ki jingtei jong ka jingpyntip bad jingpyntip (ICT)” jong ka Israel, ryngkat bad ki jaka pynmih bor ding ha ki ri thaiñ kiba don ïa ki ktem jong ka US bad ki kompeni kiba don ïa ki nongshim bynta jong ka US.
Ka la bynrap ba yn shim ia ki lad ki lynti “ban iada ia ka ri jong ngi bad ia ki jingmyntoi jong ka jaitbynriew jong ngi”.
Ka jingïaid kali lyngba ka wahduid kaba kongsan bha, ha kaba 20% na ka umphniang bad ka lyer um jong ka pyrthei ki ïaid man ka por, ka la jan sangeh noh naduh ba sdang ka thma.
Ki lieng kiba rit bha ki la lah ban iaid lyngba ia ka, kumba 5% na ka jingbun jong ka shwa ka thma, ong ka kompeni wad bniah ka Kpler.
Ki shipai Iran ki la thombor ïa ki bun tylli ki lieng, da kaba ong ba kim shym la kohnguh ïa ki “jingmaham” pyrshah ïa ka jingïaid lyngba ïa ka lynti um.
Ha kine ki sngi ba la dep, ka Iran ka la ailad ïa ki katto katne ki lieng na ki ri kiba ka shim ba ki long paralok ban ïaid, katba ka maham ba kan khanglad ïa ki lieng na ki ri kiba ka ong ba ki la ïasoh bad ka “jingleh donbor” pyrshah ia ka.
Ka iing dorbar jong ka Iran ka dang pyrkhat ban buh khajna ia ki jhad lyngba katei ka duriaw ha kaba u Lamphang ka iing dorbar jong ka Parliament u Mohammad Bagher Ghalibaf u la ong ba ka jingleit jingwan ha duriaw kan nym wanphai biang sha ka jinglong kaba ju long kumba ju long mynshwa.
