Shillong, Lber 23
Ka Sorkar Jylla ka angnud ban ïoh plie paidbah noh ïa ka Shillong Medical College hynrei haduh mynta ka dang ap ïa ka jingmynjur jong u Myntri Rangbahduh ka Ri u Narendra Modi ban wan plie.
U Myntri ka Tnat ka Koit ka Khiah ka Sorkar Jylla u Bah Wailadmiki Shylla haba kren sha ki nongthoh khubor ha ka Sngi Nyngkong u la ong, watla khlem pat lah ban plie paidbah ïa katei ka shlem pule hynrei ka jingpule ki khynnah mynta ka la ïaid shaid-shaid shakhmat ban shim ïa ki klas na ka bynta ki khynnah pule doktor.
“Ka Sorkar ka thrang dik-dik ban ïoh plie noh ïa ka Shillong Medical College, khnang ba ki paidbah kin lah ban ithuh ïa ka jingdonkam jong kane ka shlem pule doktor,” la ong u Bah Wailad.
U la ïathuh ruh ba ka Sorkar ka thrang ba u Myntri Rangbahduh ka Ri u Narendra Modi un wan ban plie ïa ka, lane lada u Myntri Rangbahduh ka Ri um lait por, u Myntri ba dei peit ïa ka Tnad ka Koit ka Khiah jong ka Sorkar Pdeng u dei ban wan.
Shuh-shuh u la ong ba ka Sorkar Jylla ka kwah ban plie noh kloi katba lah ïa ka Shillong Medical College hynrei ïa kaba mynta ka dang ap tang ïa ka jingmynjur jong u Myntri Rangbahduh ka Ri ne u Myntri ka Tnat ka Koit ka Khiah ka Sorkar Pdeng, lano kin buh por bad tarik bad ha kata ka sngi kin sa plie paidbah noh ïa ka.
