Shillong, Lber 23
U Myntri ba khmih ïa ka tnad Pule Puthi Bah Lahkmen Rymbui u la buh ïa u lain uba shai hapdeng ki artylli ki bynta jong ka jingthungkam Assistant Teacher jong u snem 2009, haba pynpaw ba ïa ki nonghikai bala pynbna thohbria da ka ïingbishar High Court kin ngat beit ha ka jingshah weng kam watla la weng noh ïa ka jingkynnoh kam bymman pyrshah ïa ki ophisar barim.
“Kine ki dei ki artylli ki mat,”ong u Myntri haba ïakren bad ki lad pathai khubor. “Ka ïingbishar kala pynbna ïa katto katne ki nonghikai ha katei ka jingthungkam kum kiba thohbria bad ïa kine ki nonghikai yn hap ban wengkam – kane ka ïeng ïa mynta”.
Ha ka 4 tarik Nailur 2025, ka ïingbishar High Court kala weng noh ïa ki jingkynnoh pyrshah ïa ka Myntri barim ka tnad Pule Puthi Kong Ampareen Lyngdoh, u Director barim ka Elementary bad Mass Education JD Sangma bad Deputy Director barim Ameka I Lyngdoh haba ïadei bad ka jingkynnoh leh bym hok ha ka jingthungkam ïa ki Assistant Teacher ki skul Lower Primary u snem 2009.
Ka Central Bureau of Investigation (CBI) kala register ïa ka case ha u 2018 haba pynshong nongrim halor ka ejahar bala mudui ha u snem 2011, ba kynnoh ba kine ki nongshah kynnoh (accused) kila ïasylla ban pynkylla ïa ki marks bad ïarap ïa ki katto katne ki kyrtong.
“Haba ïadei bad kawei pat ka case- ka ïingbishar High Court kala weng noh ïa ka mukotduma kam bymman pyrshah ïa ki,” ong u Bah Lahkmen haba bynrap “Ïa mynta, ka kam ba ïadei bad ka jingweng kam ïa kito ki nonghikai ba thohbria ka dang ïeng namar ba dei ban leh ïa kata katkum ka hukum ka ïingbishar”.
