D H Kharkongor
Nga ngeit ba ngi la ïashai uei u Ishmael bad ruh uei u Isaac nalor kaba ngi lah ïa shai ïa ka jinglongkynsai jong ka Jerusalem, kaba hamarpdeng pyrthei. Nga ngeit ruh ba kam long kaba bakla ban ong ba ka jinglong tynrai ka jong u ‘Ishmael’, kaba kumba la dep ïathuhlypa ha ka Bible, ka dei ka daw bah jong kane kaei kaei kaba jia kumne mynta hangtai ha kaba ngi ïa tip baroh kum ka ‘Middle-East’. Ha nga hi shimet kane ka jingleh lane ka jingkhyrwit (Strike) kaba kyndit kyndit jong ka Israel lembad ka America, ïa ka Iran, ka dei kaba bha tam eh. Kaba ki da leh pat ruh ïa ka ha ka ‘por’ lane ha ka ‘ïa’ kaba da biang tam eh lane ha shwa ba kan dier than eh.
Ha kaba ïadei bad kane kaei kaei ba nga da sngewtriem lane sngewshyrkhei shisha shisha ynda haba nga pyrkhat ïa kaei ka ban jia, ïa ka pyrthei hi shityllup, lada ka Israel bad ka America kin kum pyntud lane pynslem sa kumba katto katne por ïa kane ka jingkhyrwit, kaba kyndit kyndit, ka jong ki ïa ka Iran. Nga pynshong nong-rim ïa kata ka jingsngewtriem lane ka jingsngew shyrkhei ka jong nga na ka jingdon ka jong ka Iran ïa kiba kat kito ki ‘Missile Cities’, kiba ka da buhrieh bha ruh khop ïa ki shathie shapoh jong ka meiramew. Kaba katno tam jin lada ka Iran, ha ka jingsynshar donbor ka jong u Ali Khamenei, kum u Ayatollah, kan iohlad syndon ban don ïa uta u atiar uba shyrkhei na u namding ‘Nuclear’, uba da u ‘Uranium’. U atiar uba shyrkhei uba u Ayatollah u thmu ban pynurlong ïa ka jingangnud ka jong u ban pynduh pyndam shisyndon ïa ka Israel bad ruh ïa ka America, nangne na sla pyrthei.
Ym artatien ba kane ka jingjia lane kane ka jingkhyrwit tyngeh, jong ka Israel bad ka America, ïa ka Iran, kata, ïa ka Islamic Revolutionary Guard Corps (IRGC) kannym shu kut noh kumne shen shen. Tangba ïa mynta ym pat lah pat de ban ong sa katno por kan dang neh. ñiuma, u Ali Khamenei, kum u Ayatollah um don shuh. Ka Islamic Republican Guard Corps (IRGC) ka jong u, kum u khlieh duh, ruh ka la nang synjor bad ka la nang khyllem nohjrain shi jrain. Ki ‘Basijj Militi’ ruh ki la sakma. Kumta wat ki HAMAS (Islamic Resistance Movement) jong ka Palestine, ki HEZBOLLAH (Party of God) jong ka Lebanon bad ki HOUTIS (Ansar Allah) jong ka Yemen ruh kin sa nangtlot kin sa nangswai, ha baroh ki liang. La artatien ba kin dang lah ban khie khlieh biang wei ba ki dei tang ki khunrit kiba dang hap ban bsa buiñ ka IRGC kaba dei ka kmie ka jong ki. La artatien ba kin dang lah ban khie khlieh wei ba ka Israel ka la kut jingmut skhem ba kan ïaleh tad haduh ba kan da lah ban pynduh jait shisyndon ïa ki ‘radical Islam’ jong ka IRGC, kiba long ma ki ka jingma kaba khraw tam duh ïa ka pyrthei hi shityllup.
Lehse ha kaba sdang ngi la khmih lynti ba ka Russia (Magog/Rosh) bad wat ka China (ka Himana Ri Mihngi) kin ïeng ban kyrshan lane ban ïarap lem ïa ka Iran (Persia), kata, pyrshah ïa ka Israel. Te kumta ngi la ïa kum shat jingmut ba kata kaei kaei kan lam syndon shaduh sha ka ‘thma-bah pyrthei kaba 3 (lai)’ lane sha kata ka thma ‘Nuclear’ lane sha kata ka thma Armageddon’. Hynrei kam nym long kumta lane lam shaduh shata. Ngim dei pat de ban sngewphylla ïa kane ka jingbym kyrshan lem ka jong ki (Russia bad China) ïa ka Iran, ha kane ka kynti kaba mynta bad ba kin ïa kyrshan ruh de ha kaba paw shaikdar. Nga ngeit shkem ba kane kaba kumne mynta kan nym pat lam shaduh sha kata ka thma kut pyrthei lane ka ‘thma-bah pyrthei kaba 3 (lai) lane ka thma-bah ‘Nuclear’ lane ka thma ‘Armageddon’ wei ba ka ‘ïa’ lane ka por jong ka ‘Tribulation’, kaba katkum ba la thoh bad batai shaikdar ha ka Bible, kam pat kutnoh shwa.Kynmaw ruh de ba ym pat sdang ïa ka jingtei tymmai lane ka jingteibiang ïa kata ka ‘Temple’ kaba ha Jerusalem, kaba kat kum ba la ïathuhlypa ha ka Bible, naba ïa mynta ka dang dei tang ka jingpynbit pynbiang lypa, ïa baroh ki jingdonkam.
Kumta kane kaba kumne mynta kam pat dei kata ka thma kut ne wai pyrthei. Kam pat dei naba dei ban tei thymmai biang shwa ïa ka ‘Temple’ kaba hangtai ha u Lum Moriah, jong ka Jerusalem. Nga shimet nga ngeit ba kane kaba kumne mynta ka dang dei shwa ruh tang ka shi bynta jong kata ka jingsaiñ pynwandur ïa kata ka ‘jingsuk pyrthei kaba tang shipor’ lane ka ‘jingshongsuk, kaba tang shipor, jong ka pyrthei shityllup’.Ka jingsuk kaba ka pyrthei ka angnud (New World Order / One World Religion (Revelation 17:1-18) hynrei ka ban neh pat de tang shipor. Ka jingsuk ka ban sa shetshukor ïa baroh. Ka ‘jingsuk bad ka jingshong shngain’ (New World Order/Novus Ordo Seclorum) kaba tang shipor, kaba kat kum ka Bible (1 Thessalonian 5: 3).
