Babu Kular Khongjirem
Ka la kylla long ka Raibi ba man ka por (bad precedence) ba kane ka Sorkar MDA I & II ba la ïalam da ka seng NPP, UDP, etc. ka la ju mlien bha ban pynjlan shi pynjlan man ka por (re- extend the tenure) jong ki Autonomous District Council la ka dei ha Khasi Hills ne Garo Hills ruh kumjuh hi. Ka jingpynjlan jong ki ka don la ka jong ka jingthmu jong ki sha lyndet ïa kaba ki paidbah ba lui lui bapli (innocent people) kim da tip ne shemphang eh namar ki nang ban pynksan nia da kumne da kumtai.
Ka jingthmu ba kongsan eh jong kino kino ki political party kiba bat ïa ka jingsynshar ha ka ri, ka state ne Autonomous Body ka long beit na ka bynta ka jingïoh nong politic jong ki (for their political gains). Lada ki sngewthuh ba ka don jingma ïa ki, kata, kin pyrshang ban thaw lad thaw lynti ban kiar katba lah na kata. Lada ki sngewthuh pat ka ban ïohnong politic ïa ki, wut wut kin leh khlem pynslem wat tang khyndiat ruh.
Kajuh ka jingleh jong ka NPP ïa ka GHADC ba ka la rai pynjlan sa 6 bnai wat la ka la dep pynbna ïa ka ilekshon ha ka 10-04-2026 bad ka la sdang sa ka jingthep kyrteng (filing of nomination papers) hynrei ka la pynsangeh jubor na ka daw jong ka jingbthei ka jingïakhih paidbah ha West Garo Hills District. Ka NPP kaba bat ïa u lakam synshar ha baroh ar tylli ki bor (GHADC & State Govt.) kala sngewthuh lypa ba ka la duh jingshaniah (loss trust and confidence) ha ki paidbah Garo, kumta, lada pynlong la ka pynlong, ki lah ban rem kput bad duh noh ïa ka bor synshar. Ym tang katta, hynrei kan long ruh ka jingjah burom hakhmat ka pyrthei ba ka seng ba ïoh ban synshar kan rem kput ha ka ilekshon. Ym dei eh tang kata, hynrei ka dei ka rukom pyrkhat jong ka NPP (NPP policy) ba, lada ki sngewthuh ba kine ki MDC jong ka, kiba mynta (present sitting MDC) ki lah ban rem noh ha ka ilekshon ba kin ïaleh, kata, ka ju ai por (extend) shuh ïa ki sa 6 bnai khnang ba kin dang ïoh tulop bad ïoh jingmyntoi shuh sa 6 bnai na ka pisa ki paidbah. Ha KHADC ruh ki leh kumta ha ka por ba long CEM u Bah Pyniaid Sing Syiem. Ha Garo Hills lei jan man ka san snem ba ki pynjlan. Kiwei kiwei ki party kiba bat ïa ki bor synshar mynshwa ki kham kiar ban leh kumta namar ki burom ïa ka hok ki paidbah shisien san snem lait noh sa tang ba mih ki kynrum kynram ba ki phah shimti da u Administrator.
Lada ki leh pyrshah ïa ka mon bad ka hok u paidbah, i kumba ki da kmen, ki da sngewmeng bad sngew sarong pynban. Ki kular da ki nia thiang nia bang, tangba hadien te, kin sa rai pynsangeh noh kha ma kha. Kane kam jia tang ïa ka ilekshon sha GHADC hynrei ki sngewsarong bad sngewkhyllew ruh ba ki la ïoh pynsangeh noh ïa ka surok Fly- Over na Umshyrpi sha Barik kaba ki paidbah ki da angnud shisha ban kham lait na ka dheng kali. Yn nai ïakren ïa ka kam khappud, ka ILP, ka ktien Khasi ha ka 8th Schedule, nalor bun kiwei pat ki mat ba kongsan bad ba donkam ka jaidbynriew jong ngi. Ka ilekshon MP kam jngai shuh ba u paidbah un ai jingsneng biang sa shisien ïa kane ka seng. Lada phi mlien ban thok bad shukor ïa u paidbah, u paidbah ruh khlem artatien un kham stad shuh shuh ban thok bad shukor lem na ka bynta jong phi.
