Tehran, Lber:
U Nongïalam ba ha khlieh duh jong ka Iran, u Mojtaba Khamenei, u la byrngem ban pynhiar kput halor ka jingshah pynïap jong u heh duh jong ka tnat pahara, u Ali Larijani, ha ka jingleit hiar thma jong ka US bad ka Israel, ha ka Sngi Ba-ar.
U Mojtaba u la maham ba man ka sien jaw jong ka snam jong ki nong Iran, ka don ka dor kaba kordor haduh katta, kaba ka US bad ka Israel ki hap ban mad.
“Kum kine ki kam pyntieng ki pynpaw tang ia ka jingshun jong ki nongshun bad kin pynskhem ia ka jingkut jingmut jong ka jaitbynriew Islam. Khlem artatien, yn pyndep ia ka hok,” u la ong ha ka kyrwoh.
Ha ka jingkren jong u, u Mojtaba u la iathuh ba u Larijani u dei u briew uba “nang jingstad, uba iohi jngai, uba stad” bad uba don ia ki jingshem bapher bapher ha kiba bun ki liang. U la ong ba ka jingshah pyniap jong kum une u briew ka pyni haduh katno u long uba kongsan bad ka “jingshun jong ki nongshun jong ka niam Islam ia u”.
U la byrngem ia ki “nongpyrshah Islam” bad u la ong, “Ka jingpynmih ia kane ka snam ha kjat jong u dieng jong ka rukom synshar Islam ka pynlong tang ia ka ban kham khlain, bad shisha, kawei pa kawei ka snam ka don ka dor kaba ki nongpyniap briew kiba leh kam sniew ia ki martyr ki dei ban siew kloi.”
Haba pynkut ïa ka jingkren jong u, u la ai ka jingsngewlem ïa ka tnga jong u Larijani, ki khun ki kti, u hynmen bad kiwei kiwei ki bahaïing hasem.
Ka jingshah pyniap jong u nongpyniaid bor ba donbor tam jong ka Iran, U Ali Larijani, ka la pynlong ia ka Islamic Republic ban rung sha ka kyrdan kaba kham khlem thikna, kaba pynjynjar ia ka jingshim rai ha Tehran bad pynrit ia ki lad ki lynti jong ka katba ka thma ka nang iaid.
Ka thma jong ka US-Israel pyrshah ïa ka Iran, ka la sdang na ka jingshah pynïap jong u nongïalam ba hakhlieh duh, u Ayatollah Ali Khamenei ryngkat bad ka kynhun ki heh shipai bad kam pyni dak eiei ruh ba kan nang hiar, ha kaba sa katto katne ngut ki heh ophisar mynta ki la shah thombor ha ki jingshah thombor ha ki liengsuiñ.
La ju pyrkhat ba u Larijani u la pyrshah ia ka jingthung ia u Mojtaba Khamenei ban mih bujli ia u kpa jong u uba la khlad noh kum u nongialam ba ha khlieh duh, halor ka nongrim ba ka jingsynshar hiar pateng ka iahap bad ki nongrim jong ka Islamic Republic.
U Larijani, u dei uba iajan bha bad u Khamenei, uba la thung ia u, ban khlieh ia ka TV bad radio jong ka sorkar Iran bad ban shakri kum u nongmihkhmat jong u, ha ka dorbar sain pyrthei, kaba pynbeit ia ki jingiakajia ha ka liang ka ain.
Hadien ba ka prokram nuclear jong ka Iran ka la kylla long ka jingeh kaba khraw ha ki ri Sepngi, u Larijani u la shimti ïa ka kam ba ha khlieh duh jong ka jingïada ri ha u snem 2005, kaba la pynlong ïa u kum u nongïakren nuclear ba hakhmat eh jong ka ri.
Ka Iran, ka la byrngem ban siew kylliang ia ka jingshah pyniap jong U Larijani. U heh shipai jong ka, U Amir Hatami, u la ong ba ka jingkynthoh jong ka Tehran halor katei ka jingshah pyniap kaba heh kan long kaba “rai bad kaba sngewsih”.
