Shillong, Lber 23
Ka lympung ïalehkai 5th District League T20 Cricket Tournament 2026 ba la pynïaid da ka East Khasi Hills Cricket Association ka la nangjam shaphrang ha ka lah sngi U Blei ha kaba ka Friends United CC bad ka Laitjem CC ki la khur jingjop.
Ha kane ka jingïakhun kaba la long ha madan Saitsohpen kaba ha Sohra, ka Friends United ka la pynliem noh ïa ka Rangshken ACC da 37 run. Ka Friends United kaba la tied nyngkong ka la kamai 165 run bad shah pynhap 8 wiket ha ki 20 over. U Nathaniel N Lynrah u la tied 49 run na ki 30 bol. Katba u Hamostar u la khur 3 wiket na ka bynta 15 run ha ki 3 over.
Haba wan beh ïa ka thong, ka Rangshken ka la kamai tang 128 run bad shah pynhap 6 wiket ha ki 20 over. U Banshailang u la tied 30 run na ki 19 bol. Katba u Larikupar Nongkynrih u la khur 2 wiket na ka bynta 18 run ha ki 4 over. Ïa ka nam Player of the Match la khur da u Wansiewsor Lyndem.
Haba phai sha kawei pat ka jingïakhun kaba ar, ka Laitjem ka la jop da 4 wiket ïa ka Cricket Lovers. Ka Cricket Lovers kaba la kam trai ban tied nyngkong, ka la kamai 113 run bad shah pynkhyllem baroh ki nongtied ha ki 18 over. U Pyndap L Nonglait u la tied 29 run na ki 18 bol. Katba u Mebanshan Kharsati u la khur 3 wiket na ka bynta 17 run ha ki 4 over.
Ka Laitjem ka la lah ban kynjoh sha ka thong ha ka jingwan shimti ïa ka pali tied kaba ar da kaba kamai 116 run bad shah pynhap 7 wiket ha ki 17.5 over. Kane ka la wan lyngba ka jingïalehkai bha u Marken B Kharkongor uba la khyrwit ïa ka shiteng spah kaba 58 run na ki 38 bol. Katba u Namewanki Pakynteiñ u la khur 3 wiket na ka bynta 23 run ha ki 3 over. Ïa ka nam Player of the Match la khur da u Marken.
