Shillong, Lber 23
Ka Garo Hills Autonomous District Council (GHADC) kaba la ïalam da ka National People’s Party (NPP) ka la wanrah jingkylla ha ki kyndon jong ka (AD Rules) ban pynlong kongsan ïa baroh ki kyrtong ban don ïa ka syrnot ‘Scheduled Tribe’ (ST) haba ïakhun ïa ka ilekshon sha ka District Council.
Kane ha kawei ka liang ka pyrkhing ruh ïa ka jingïashim bynta ilekshon jong kito ki bym dei ‘riewlum – ka sien kaba nyngkong eh naduh ba la thaw ïa ka Council ha u snem 1952.
U Myntri Rangbah ka Jylla, u Conrad K. Sangma u la ïaroh ïa kane ka sienjam bad ong ba ka long kum “ka jingsahkynmaw ha ka histori” jong ka GHADC kaba la shong ïa ka Dorbar Kyrpang (jong ka) ha ka Lah Sngi U Blei.
“Mynta ka sngi ha ka Dorbar jong ka District Council, ka Ïingdorbar ka la mynjur ïa ka rai ka ban sah kynmaw ha ka histori…ha kaba, la pynlong kongsan ïa kino-kino ki kyrtong kiba ïakhun ban don ïa ka syrnot ‘Scheduled Tribe’,” la ong u Conrad.
“Kane ka dei ka rai kaba kongsan bha…ki District Council ki dei kiba la thmu beit thik na ka bynta ki ‘riewlum jong ka thaiñ. Ka la long ka jingdawa kaba la slem bah jong ki paidbah, hynrei ha kine ki 74 snem ba la dep, ym don kawei ruh na ki Sorkar ne ki District Council kiba lah ban leh ïa kane,” u la ong.
Kane ka jingpynkylla ka pynrung ïa ka jingdonkam jong ka syrnot ha ki kyndon ilekshon jong ka GHADC, kaba khang ïa ka jingplie kaba ailad ïa ki nongshong shnong ki bym dei ‘riewlum ban ïeng kum ki kyrtong ban long dkhot ha GHADC – ka shnat treikam kaba la pynkha hapoh ka Khyrnit ba 6 ban ïada ïa ka jingsynshar hi dalade-ïalade jong ki’riewlum.
Na ka liang u Conrad, u la kyrpad ban pdiang ïa kane da kaba jingjai-jai.
“Nga tikna ba baroh ki paralok jong ngi ki bym dei ‘riewlum kin sngewthuh ba kane ka Council ka dei beit na ka bynta ki ‘riewlum…nga tikna ba kan don ka jingïatreilang na baroh ki liang bad baroh ngin ïatreilang ha ka jingsuk bad ka jingïatylli ban pyntikna ba ngin rah shakhmat ïa ka Ri-lum Garo, ka Jylla bad ka thaiñ baroh kawei.”
Kane ka rai ka wan ruh hadien jong ka rai ka Sorkar Jylla ban pynjlan ïa ka samoi treikam (ba mynta) jong ka GHADC da hynriew bnai hadien ki jingïakhih kiba jur da ki taïew pyrshah ïa ka jingïashim bynta jong ki bym dei ‘riewlum ha ka ilekshon sha ka Council, kaba la buh por hashuwa ban long ha ka 10 tarik u Ïaïong.
Kumban shu kdew hangne, da ki hajar ngut ki paidbah ki la ïalum hakhmat ka ophis treikam ka NPP ban ïashad kmen bad ïarisa halor ka jingurlong ka jingangnud jong ki ban khang ïa ki bym dei ‘riewlum ban ïakhun bad thep ‘vote’ ha ka ilekshon GHADC.
