Shillong, Lber 23
Ka S10 Healthcare ka la long ka lahduh ha ka lympung ïalehkai Big FM’s Big Futsal Fest 2026, hadien ba ka la lah ban pynliem noh ïa ka Shillong Police da 6-5 kol ha ka jingïakhun final kaba la long ha Thrive Sports Arena kaba ha Langkyrding.
Ïa kane ka lympung la sdang naduh ka sngi Ba-ar jong ka taïew ba la lah, ha kaba la wan shim bynta da ki kynhun ïalehkai na ki tnat treikam bapher bapher jong ka Sorkar Jylla.
Baroh ar tylli ki kynhun ki la lah ban pyni ïa ka jingtbit ha ka rukom ïalehkai bad ka jingkhlaiñ. Ka Shillong Pulit ka la ïoh ban pynkhih jar nyngkong, hynrei ka S10 Healthcare ka la lah ban pynphai kylla.
Ha kaba kut, dei ka S10 Healthcare kaba la lah ban khur ïa ka jingjop hadien ba ka la lah ban ïakhun tyngeh na ka bynta ban long ka lahduh ha ka Big Futsal Fest 2026. U Gabriel Blah bad u Russell Lyngdoh Nongkynrih ki la long ki ar ngut kiba la lah ban khur ïa ki hat-trick.
Haba phai sha kawei pat ka jingïakhun kaba la long kham hashwa na ka bynta ban ïaknieh ïa ka kyrdan balai (third place), ka Meghalaya Secretariat Home Guard ka la jop ïa ka Meghalaya Legislative Assembly da 1-0 kol lyngba ka tri-breaker.
La pynkut ïa kane ka lympung da ka jingsam ïa ki khusnam da u Bah A. L. Hek, MLA ka Pynthorumkhrah ha ryngkat ka jingïadon lang u rangïalehkai phutbol barim ka Jylla u Samuel Shadap. Ïa ka nam Best Goalkeeper la ïoh da u Ivannature Nadon na ka Water Resources, Highest Goal Scorer ka leit sha u Gabriel Blah na ka S10 Healthcare, bad ïa ka nam Best Disciplined Team la ïoh da ka Water Resources.
Ïa kane ka lympung la pynlong da ka Big FM ha ryngkat ka jingkyrshan lang da ka tnat ïalehkai ka Sorkar Jylla.
