Ranchi, Lber:
Kumba la ïathuh ka tyllong khubor la ong ba la lap ïa ki tiar pynbthei kum u bom uba khia 500 pound (kumba 226.7 kg) uba la ngeit ba u dei uba wan na US, la lap ha ki rud jong ka wah Subarnarekha ha East Singhbhum distrik ha ka miet sngi Ba-ar, la ïathuh ki pulit.
Une u tiar pynbthei, uba ïasyriem bad ka tyndong gas, la lap da ki trai shnong, ha ka por ba ki dang tih ïa u shyiap, ha shi lynter jong ka jaka kaba don ha Panipada-Nagudsai, kaba don hapoh u pud u sam jong ka thanat pulit jong ka Baharagora. Ki pulit ki la ïathuh ba la thoh ïa ka dak “AN-M64 500 lb American-made” ha ka bynta ba shabar jong katei ka tiar siat.
Hadien ba ka khubor jong ka jinglap ïa une u tiar ba la suba ba u dei u bom ka la saphriang, ki nongshong shnong ki la ïa lum lang ha katei ka jaka ban sakhi da la ki jong ki khmat. Hadien kata ki pulit ki la poi bad ki la ker kut ïa katei ka jaka.
Katkum ka jingïathuh ka tyllong khubor, u ophisar ba dei peit ïa ka thanat Baharagora, u Shankar Prasad Kushwaha u la ong, “Ngi la buh arngut ki pulit ha katei ka jaka ban khanglad ïa ki briew ban leit shajan jong katei ka tiar.”
Ka khubor ka la ïathuh shuh shuh ba ïa ki pulit la buh na ka bynta ka jingpyntreikam ban khmih bniah ha ka ban khanglad ïa ki briew ba kin tur sha katei ka tiar ba la lap, la ïathuh shuh shuh u heh pulit.
U la bynrap ruh ba la pyntip sha ki heh ophisar halor kane ka jinglong jingman.
La ïathuh ba ka Kalaikunda Air Force Station, kaba don ha West Bengal, ka dei ban ïarap ha katei ka jingtohkit, bad la khot ruh ïa ka kynhun pynduhbor ïa u bom, na ka bynta ban ai jingkyrshan, kumba la ïathuh da ka tyllong khubor.
Ki nongshong shnong ki la ai jingmut ba utei u bom u lah ban don jingïadei bad ka thma bah ba ar ne ka thma Indo-Pak ha u snem 1971.
Kawei pat ka jingmaham ka long ba ka lah ban wan na ki tiar ïaleh ba la kit da ka liengsuiñ ïapom kaba la hap ha ka wah Subarnarekha ha u snem 2018 hadien ba ka la kiew na Kalaikunda, kaba don kumba 67 km eiei na katei ka jaka.
U Arvind Singh, uba dei u heh jong ka tnad histori jong ka Kolhan University, u ong ba katei ka jinglap, ka long kaba phylla, namar ba ka United States, kam shym la pynneh pynsah ïa kino kino ki tiar siat lane ki jaka buh ïa ki tiar shipai ha ki bynta ba Shatei-lam-Mihngi jong ka India, ong ka khubor.
Shuh shuh u la kdew ruh ba wat ha ka por jong ka thma 1971 ruh ym shym la don kano kano ka jingthoh ba la pynpoi ïa ki bom jong ka US lyngba ka Baharagora.
Kat kum ka jingong jong u, ka jingtohkit jong ki bor pynïaid (forensic investigation) kan ïarap ban lap ïa ka tynrai jong une u bom.
