New Delhi, Lber:
Ka kynhun National Investigation Agency (NIA) ha ka lah sngi U Blei ka la pynlong ïa ka jingleit khynra ha ryngkat ka jingïatreilang ha kylleng ki jaka ha Jammu & Kashmir kum shi bynta jong ka jingtohkit kaba dang ïaid shakhmat halor ka jingjia bthei bom kali kaba la jia ha Delhi.
Katkum ka jingïathuh jong ki heh sorkar, la pynlong ïa ka jingkhynra ha ki khyndai tylli ki jaka, ba kynthup ïa ki jaka ha Handwara (Kupwara distrik), Rafiabad (Baramulla distrik), kumjuh ruh ha ki bynta jong ka Kulgam bad Srinagar.
Ka jingtohkit ka ïadei bad ka jingbthei bom kaba la jia ha ka 10 tarik u Naiwieng hajan ka Delhi’s Red Fort kaba la pynlong ym duna ïa ka 13 ngut ki briew ban ïap bad katto katne ngut kiwei pat ki la mynsaw.
Ki bor pynïaid ki la ithuh ïa u nongthombor ha ka jingjia ïa uba la tip kyrteng kum u Umar Un Nabi, uba dei u doktor bad u Assistant Professor ha Al Falah University ha Faridabad, une u la leh ïa kane ka kam thombor da kaba pyndonkam ïa ka kali kaba la thep ïa ki tiar pynbthei.
Haduh mynta, ka kynhun NIA ka la kem ïa 11 ngut ki briew kiba donkti bad ka jingjia, bad ka jingtohkit kaba kham bniah ka dang ïaid shakhmat.
