Shillong, Lber 23
Ka Hynñiewtrep Integrated Territorial Organization (HITO) ha ka 23 tarik u Lber 2026, hapoh ka jingïalam u Bah Donbok Dkhar, President, ka la leit ban buh da ka jingujor pyrshah ïa ka karkhana Riangdo Veneer Private Limited kaba pynkheiñ ïa ki aiñ, da kaba pynmih ïa ka tdem jaboh.
Haba kren sha ki lad pathai khubor u Bah Donbok Dkhar u la ong ba ka seng ka la lap ïa kane ka jingpynmih tdem jaboh katei ka karkhana ka dei hadien ba ki la hiar sha katei ka jaka dang ha kine ki khyndiat sngi, kaba la isaitmet ban peit ïa ka jingjaboh ka tdem kaba ki pynmih.
Kumta u la dawa ba ka Meghalaya State Pollution Control Board (MSPCB) ka dei ban shim kam halor kane ka jingleh katei ka karkhana bad ka jingbym pyndonkam ruh ïa ka Pollution Control Device (PCD).
“Ka MSPCB ka dei ban shimkam mardor pyrshah ïa ka tei ka karkhana ka Riangdo Veneer kaba la pynmih ïa ka tdem ba jaboh,” u la ong.
“Ngi ïohi ba ka Jylla Meghalaya ka la ïoh ïa ka nam ba jaboh tam lyngba ka Byrni bad ngim kwah ba ka Umiam ruh kan long kumba long kumjuh. Ngi la kyntu jur ïa ka ophis ka MSPCB ba ki dei ban pynshitom ïa kine ki kompeni kiba leh tam,” la ong shuh shuh u Bah Donbok.
U la kynnoh ruh ba ka jingïoh jaka katei ka kompeni ban shna karkhana ha katei ka jaka ka lah ban don ei-ei sha lyndet namar ka dei ka jaka jong ka MeECL bad kumno ki ai jaka ban shna karkhana. Da kaba ong ruh ba ka Sorkar ka long kaba matlah bad kaba syllen namar ba ki la kwah beit ban mait ïa ki dieng ki khlaw ki btap khlem da burom shuh.
U Bah Donbok u la byrngem ruh ba lada ka MSPCB kam shim kam pyrshah ïa katei ka karkhana, ka seng kan sa shim pat da kiwei pat ki sienjam da kaba tyngeh.
